Ndërlidhjet

TEHERAN


Irani tha se do të vendosë 3.000 centrifuga në uzinën për pasurimin e uraniumit në Natanz, si reagim ndaj rezolutës së Këshillit të Sigurimit të Kombeve të Bashkuara.
Rezoluta e miratuar dje i vendos sanksione Iranit për shkak se refuzoi të ndërpresë pasurimin e uraniumit.
Instalimi i 3.000 centrifugave do të ishte hap i rëndësishëm për pasurimin e uraniumit në shkallë industriale, proces për të cilin Perëndimi mendon se mund të çojë në ndërtimin e bombës bërthamore.
Presidenti i Iranit Mahmud Ahmedinejad e hodhi poshtë rezolutën duke e cilësuar "copëz letre", dhe tha se anëtarët e Këshillit të Sigurimit do të pendohen që i mbështetën sanksionet kundër vendit të tij.
"Ju them se aksionet e tashme jo vetëm që nuk do ta dëmtojnë Iranin, por së shpejti do t'ju vijë shumë keq për këtë akt të pavlerë dhe shumë artificial", tha Ahmadinejad.
Masat ndëshkuese ndaj Iranit janë më pak kufizuese se drafti fillestar. Ambasadori rus në KB Vitaliy Churkin, i cili kishte rolin kryesor në zbutjen e sanksioneve, tha se rezoluta përjashton përdorimin e forcës ndaj Iranit.
Ndërkohë, ambasadori britanik Emir Jones Pary tha se sanksionet kanë për qëllim kthimin e Iranit në tryezën e bisedimeve.
"Rezoluta potencon seriozitetin e situatës, duke përfshirë edhe mungesën e besimit të bashkësisë ndërkombëtare sa i përket drejtimit të politikës iraniane. Është me rëndësi që dyert nuk janë të mbylluar për Iranin. Ne mbesim të përkushtuar të gjejmë një zgjidhje diplomatike", tha ambasadori britanik Jones Pary.
Shtetet e Bashkuara e kanë përshëndetur zbatimin e sanksioneve kundër Iranit, por kanë ftuar Rusinë, Kinën dhe vendet tjera për masa më të ashpra kundër Teheranit, ka deklaruar nënsekretari shetëror amerikan Nicholas Burns.
Miratimin e rezolutës e ka përshëndetur edhe Izraeli.
XS
SM
MD
LG