Kryeadministratori ndërkombëtar i Kosovës, Harri Holkeri, gjatë një takimi me kryeministrin e Serbisë, Vojislav Koshtunica, sot në Beograd, ka thënë se prioritet i UNMIK-ut është nxjerrja para drejtësisë e organizatorëve të dhunës së fundit në Kosovë dhe ndërtimi i shtëpive dhe kishave të dëmtuara, bën të ditur zyra e UNMIK-ut në Prishtinë. Ndërkaq kryeministri i Serbisë, Koshtunica ka thënë se qeveria e tij së shpejti do të propozojë një plan për të zgjidhur problemet e serbëve të Kosovës përmes institucioneve. Në komunikatën e zyrës së Koshtunicës nuk jepen detaje të tjera, por thuhet se kjo do të jetë një zgjidhje demokratike që respekton normat dhe standardet evropiane të të drejtave të njeriut.