Sekretari amerikan i shtetit, Colin Powell kërkoi nga senatori Edward Kennedy që të jetë më i kujdesshëm në kritikat e tij për luftën në Irak, pas komenteve të zotit Kennedy se kjo luftë është "Vietnami i George Bushit". Duke folur në radion Fox News, zoti Powell tha se senatori Kennedy "do të duhej të ishte pak më i përmbajtur dhe i kujdesshëm pasi Amerika është në luftë". Zëdhënësi i zotit Kennedy, David Smith tha se senatori "ka respekt të jashtëzakonshëm për sekretarin e shtetit Powell dhe e kupton se pse ai ndjen nevojën për ta mbrojtur politikën e presidentit".
