UASHINGTON

Raporti kryesor për programet e armëve irakiene ka arritur në përfundimin se në Irak nuk ka patur stoqe të armëve kimike, biologjike apo bërthamore, para fillimit të luftës vitin e kaluar. Kryeinspektori i ekipit amerikan, Charles Duelfer, e paraqiti raportin prej më shumë se 1.000 faqesh në Komitetin e Senatit për Shërbimet e Armatosura.
"Nuk mund të themi përfundimisht nëse materialet e armëve për shkatërrim në masë janë transferuar nga Iraku para fillimit të luftës. As nuk mund të përgjigjemi për mundësinë e mbetjes së tyre, megjithëse gjykimi im është se stoqet nuk kanë mbetur", tha Duelfer.
Administrata e presidentit George Bush e justifikoi luftën në Irak me pohimet se Bagdadi zotëron armë të tilla.
Pa iu referuar raportit, gjatë fushatës në Pensilvani, presidenti, George Bush, e mbrojti ndërhyrjen në Irak.
"Pas 11 shtatorit, Amerika duhej ta vlerësojë çdo kërcënim potencial në dritën e rrethanave të reja. Duhej të vështronim çdo vend, ku terroristët mund t'i shtinin në dorë armët e tilla. Njëri regjim u dallua: diktatura e Saddam Husseinit", tha presidenti Bush.
Zëdhënësi i kandidatit presidencial demokrat John Kerry tha se raporti "thekson paaftësinë e politikës së Bushit ndaj Irakut".