Në raportin më të ri të organizatës Fredom House, është vlerësuar se, gjatë dy viteve të fundit, në planin e demokracisë dhe të lirisë, është shënuar përparim, por një e treta e banorëve në mbarë botën ende nuk gëzojnë të drejta themelore politike dhe qytetare. Sipas shkallës së respektimit të të drejtave politike dhe qytetare, 192 shtete, janë klasifikuar në tri kategori: të lira, pjesërisht të lira dhe jo të lira. Kosova është radhitur në tabelën e "territoreve kontestuese" dhe është vlerësuar me shkallën "pjesërisht e lirë". Shqipëria, Maqedonia dhe Bosnjë Hercegovina, nga lista e vendeve të pavarura, janë vlerësuar si "pjesërisht të lira", ndërsa Serbia dhe Mali i Zi janë vlerësuar me shkallën "e lirë". 49 shtete janë vlerësuar me shkallën "jo të lira". Në këtë grup gjenden Birmania, Kuba, Libia, Korea Veriore, Arabia Saudite, Sudani, Siria dhe Turkmenistani.