Armata izraelite ka hapur zjarr mbi një ambulancë pranë skenës së luftimeve në një kamp refugjatësh në Bregun Perëndimor, duke vrarë një mjek dhe plagosur tre ndihmës të tij. Më herët gjatë ditës, armata izraelite vrau tetë palestinezë, midis të cilëve edhe Amjad Fakurin, lider i Brigadave të Martirëve Al-Aksa për rajonin e Xheninit. Zhvillimet e sotme pasuan një takim të kabinetit izraelit të Sigurisë, i cili vendosi mbrëmë që të forcojë aksionet ushtarake kundër palestinezëve, pas vrasjes në fundjavë të 21 izraelitëve.
