Presidenti i Shteteve të Bashkuara, George Bush, ka nxitur Izraelin të ndalë inkursionet në territoret e kontrolluara nga palestinezët dhe njoftoi se do të dërgojë në rajon sekretarin e Shtetit, Kolin Pauell, të ndërmjetësojë për dhënien fund konfliktit të dhunshëm. Në fjalimin e mbajtur në Shtëpinë e Bardhë, presidenti Bush i bëri gjithashtu thirrje qeverisë së Jaser Arafatit, të heqë dorë nga mbështetja që i jep terrorizmit palestinez dhe t’i njohë Izraelit të drejtën e ekzistencës.
