Ndërlidhjet

Ruecker porosit serbët: S’ka ndarje të Kosovës


Joachim Rucker

Joachim Rucker

Shefi i UNMIK-ut, Joachim Ruecker, ka qëndruar në Mitrovicë, ku ka zhvilluar dhe një debat me studentët serbë. Ruecker u ka thënë atyre se bashkësia ndërkombëtare nuk pranon kurrfarë ndarjeje të Kosovës.


Shefi i Misionit të Kombeve të Bashkuara në Kosovë, Joachim Ruecker, ua ka transmetuar studentëve dhe banorëve serbë të Mitrovicës qëndrimin e bashkësisë ndërkombëtare se nuk ka ndarje të Kosovës.

Gjatë një vizite që Ruecker i bëri pjesës veriore të Mitrovicës, ku në veçanti u ndal dhe zhvilloi takime me studentët serbë, ai tha se komuniteti serb duhet të integrohet në kuadër të sistemit legal dhe të shmangë kështu praktikën e funksionimit përmes strukturave paralele.

“Kam ardhur të takoj studentët e Mitrovicës, të cilët janë një ndër përgjegjësit për demonstratat që i kemi parë këto ditë”, tha Ruecker.

Ai tha po ashtu se ua ka sqaruar atyre pozicionin ndërkombëtar për Kosovën dhe i ka dëgjuar edhe pikëpamjet e tyre.

“E ardhmja e Kosovës është integrimi i saj në Bashkimin Evropian”, theksoi Ruecker.

Ndërkaq, rruga për në BE, sipas shefit të UNMIK-ut, përcillet jo me ndarjen e Kosovës, por me një Kosovë unike e të bashkuar.

“Mandati i UNMIK-ut, si dhe i KFOR-it, rezulton nga bashkësia ndërkombëtare dhe nuk ka të bëjë me ndarjen e Kosovës”, u tha Ruecker studentëve serbë.

Ai tha se strukturat legale, si ato vendore dhe ndërkombëtare, do të vazhdojnë të ballafaqohen me të gjitha sfidat eventuale, duke e respektuar integritetin territorial të Kosovës.

Shefi i administratës ndërkombëtare u ka bërë thirrje edhe policëve serbë që të kthehen në vendet e tyre të punës.

Qëllimi i bashkësisë ndërkombëtare, shtoi ai, është që në Kosovë të krijojë një shoqëri shumetnike e demokratike, që nënkupton edhe institucione gjithëpërfshirëse.

Ruecker tha po ashtu se beson që mesazhet e bashkësisë ndërkombëtare do t’i pranojnë dhe kuptojnë edhe serbët e Kosovës, në mënyrë që edhe ata të jenë pjesë e këtij procesi që e shpien Kosovën kah perspektiva evropiane.

Shefi i UNMIK-ut mbetet ende autoriteti kryesor në Kosovë, edhe pas shpalljes së pavarësisë. Këtë pozitë ai do ta ketë përderisa UNMIK-u të mos fillojë tranzicionin, që nënkupton bartjen e kompetencave te autoritetet vendore dhe zëvendësimin e UNMIK-ut me misionin e BE-së.
  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

XS
SM
MD
LG