Ndërlidhjet

logo-print

Kermabon: EULEX-i do të shtrihet në gjithë territorin e Kosovës


Yves de Kermabon

Yves de Kermabon

Përparimet në sundimin e rendit dhe ligjit në Kosovë do të jenë prioritetet kryesore të misionit të EULEX-it, ka thënë shefi i këtij misioni, Yves de Kermabon. Ai tha se misioni i tij do të shtrihet në gjithë territorin e Kosovës, përfshirë edhe veriun.


Misioni i EULEX-it do të shtrihet në gjithë territorin e Kosovës, ka thënë sot shefi i këtij misioni, Yves de Kermabon. Këto komente, Kermabon i ka bërë pas takimeve që zhvilloi sot, në Prishtinë, me udhëheqësit më të lartë kosovarë.

Pikësynim kryesor i misionit të tij në Kosovë, Kermabon tha se do të jetë luftimi i korrupsionit dhe krimit të organizuar dhe garantimi i sundimit të ligjit si bazë e funksionimit të një shoqërie demokratike. Ai premtoi përmirësimin e sundimit të rendit dhe ligjit, duke shprehur përkushtimin e tij që këtë do ta bëjë në partneritet të ngushtë me institucionet e Kosovës.

“Qëllimi im është që të punojmë në gjithë territorin e Kosovës dhe misioni EULEX ka si synim që të shpërndahet gjithandej në Kosovë dhe të punojë për të gjithë qytetarët e saj, përfshirë edhe komunitetet”, tha Kermabon.

Shefi i misionit civil e policor të Bashkimit Evropian tha se shpresonte që gjatë misionit të tij të ketë një rol kryesisht këshillëdhënës dhe nuk do të ketë nevojë të përdorë autorizimet e tij, që i mundësojnë edhe pushtet ekzekutiv, edhe ndërhyrje në vendimet e institucioneve të Kosovës, në çështjet që kanë të bëjnë me sundimin e ligjit.

Sa i përket vazhdimit të misionit të UNMIK-ut në Kosovë edhe pas fillimit të mandatit të EULEX-it, Kermabon tha se kjo nuk i përket atij që ta komentojë dhe se aktualisht po punon në vendosjen e EULEX-it në mbarë Kosovën, përfshirë edhe pjesën veriore.

Ndërkaq, presidenti Fatmir Sejdiu tha se i ka ofruar shefit të EULEX-it bashkëpunim të plotë në misionin e përbashkët për një rend ligjor e demokratik në Kosovë.

“I shpreha gatishmërinë tonë të bashkëpunimit më të thellë dhe më të ngushtë të mundshëm bashkë me misionin ndërkombëtar, me zotin Feith. Dhe, kjo periudhë e prezencës dhe e ndihmës së Kosovës të jetë në kualitetin e vet të menduar, për t’u realizuar në efektshmëri të plotë dhe për të arritur po ashtu objektivin tonë të rëndësishëm, në një ecje të sigurt drejt integrimeve euroatlantike. Mendoj se rezultatet nuk do të na mungojnë”, u shpreh Sejdiu.

Ndërkohë, kryeministri Hashim Thaçi tha se institucionet e Kosovës e kanë mirëpritur që moti misionin policor e gjyqësor të BE-së, duke besuar se angazhimi i përbashkët i vendorëve dhe ndërkombëtarëve do ta afrojë Kosovën kah integrimet euroatlantike.

Në anën tjetër, kryetari i Kuvendit, Jakup Krasniqi, tha se e mirëpret rolin e BE-së në sundimin e ligjit, pasi që, sipas tij, edhe ashtu Kosova ka nevojë për më shumë përparime në këtë fushë.

“Ne e dimë që do të kemi vështirësi, si ne, ashtu edhe EULEX-i, në detyrat dhe obligimet që kemi. Por, besojmë dhe shpresojmë se EULEX-i do ta shtrijë ndikimin e vet në tërë hapësirën e Kosovës dhe sundimi i rendit e ligjit do të marrë hapësira të reja”, u shpreh Krasniqi.

Udhëheqësit kosovarë i kanë komentuar sot edhe tendencat e sërishme të Serbisë që t’i mbajë zgjedhjet e ardhshme edhe në territorin e Kosovës. Ata nuk dhanë ndonjë përgjigje të prerë apo vendim se si do të sillet Qeveria e Kosovës në këtë situatë, por, si tha kryeministri Thaçi, gjithnjë duhet bërë dallimi ndërmjet Beogradit dhe serbëve që jetojnë në Kosovë.

“Kosova është e pavarur; Serbia po ashtu është vend i pavarur. Ne do të investojmë që të kemi raporte të mira bashkëpunimi edhe me Serbinë, por gjithnjë duhet të bëjmë dallime në mes shtetit të Serbisë dhe qytetarëve shtetas të Serbisë”, theksoi Thaçi.

Ndryshe, Yves de Kermabon është njohës i mirë i rrethanave dhe zhvillimeve në Kosovë dhe për një vit ai ka qenë edhe komandant i KFOR-it.
  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

XS
SM
MD
LG