Presidenti dhe kryeministri i Kosovës, Fatmir Sejdiu dhe Hashim Thaçi, sot kanë hedhur poshtë çfarëdo mundësie të ndarjes së Kosovës.
Duke komentuar komentin e ministrit serb për Kosovën, Slobodan Samarxhiq, Sejdiu dhe Thaçi kanë thënë se çfarëdo propozimi që ofron ndarjen, është i papranueshëm për shtetin e Kosovës.
Presidenti Sejdiu ka thënë se për këtë propozim nuk është biseduar me UNMIK-un, sepse ai nuk u është dërguar institucioneve kosovare, por vetëm misionit të Kombeve të Bashkuara.
"Kurdo që dikush del me idenë për ndarje, ne nuk kemi përgjigje tjetër. Ne, Kosovën e trajtojmë në kufijtë integralë. Ka vështirësi në veri që datojnë më herët, por ne do të kërkojmë nga UNMIK-u, EULEX-i dhe NATO-ja që të ruajnë sigurinë, sepse kjo është në interesin e rajonit", ka thënë presidenti i Kosovës, Fatmir Sejdiu.
Ai ka shtuar se "institucionet e Kosovës do të jenë partnerë të mirë që do të bashkëpunojnë në funksionalizimin e gjithë Kosovës dhe në të gjitha pjesët e saj".
Kryeministri i Kosovës, Hashim Thaçi, ka qenë edhe më i prerë.
"Në Beograd mund të hartojnë plane dhe ide të ndryshme, të kqija e edhe më të kqija për Kosovën, por ato janë të papranueshme për institucionet e shtetit të Kosovës. Kosova ka institucionet e veta legjitime me autoritet të plotë në gjithë territorin e saj. Ka gjithashtu edhe bashkëpunimin me institucionet ndërkombëtare dhe NATO-n. Rrjedhimisht, propozimet e Beogradit për Kosovën janë të papranueshme dhe nuk mund të zbatohen", ka thënë kryeminsitri Thaçi.
Ai, mediave kosovare u ka rekomanduar që të mos merren shumë me këto plane, për të shtuar se Kosova është shteti më i sigurt dhe më i mbrojtur dhe se territori i saj është unik dhe i pandashëm.
Siç dihet, ministri i Serbisë për Kosovën, Slobodan Samarxhiq, ditë më parë, ka propozuar "krijimin e atmosferës për ndarjen funksionale të serbëve dhe të shqiptarëve në Kosovë".
UNMIK-u ka bërë të ditur se planin e ka dërguar në New York, por zëvendësshefi i misionit të Kombeve të Bashkuara në Kosovë, Larry Rossin, ka deklaruar se për UNMIK-un ndarja e Kosovës në çfarëdo forme është e papranueshme.