Ndërlidhjet

logo-print

Pas mbajtjes së zgjedhjeve lokale të Serbisë edhe në Kosovë, paralajmërohet konstituimi i organeve serbe në veri. Këtë e konfirmoi edhe ministri serb për Kosovën, Sllobodan Samarxhiq, i cili po qëndron në Kosovë.


Beogradi zyrtar paralajmëron konstituimin e organeve paralele nëpër komunat e banuara me shumicë serbe në Kosovë brenda 15 ditësh.

Përfaqësuesit serbë, të dalë nga zgjedhjet e 11 majit të mbajtura edhe në Kosovë, një proces zgjedhor i cilësuar si ilegal nga ana e autoriteteve vendore dhe ndërkombëtare, pritet që t’i konstituojnë organet e reja komunale fillimisht në tri komunat veriore të Kosovës.

Ndërkohë që administrata e UNMIK-ut vazhdon të deklarohet se nuk i njeh dhe nuk do të bashkëpunojë me këto organe.

Por, ministri serb për Kosovën, Sllobodan Samarxhiq, gjatë qëndrimit, këto dy ditët e fundit, në Kosovë, ka deklaruar se organet komunale do të konstituohen brenda 15 ditëve, mbi bazën e ligjeve të Serbisë.

“Këtu do të formohen organet e reja ekzekutive dhe administrata e vetëqeverisjes lokale, në mënyrë që Serbia, përmes këtyre organeve, t’i zbatojë funksionet e veta shtetërore aty ku është e mundur, e në këtë rast kjo zbatohet në komunat me shumicë serbe”, tha Samarxhiq.

Serbët e Kosovës, sidomos ata të pjesës veriore, po i bëjnë përgatitjet e fundit që t’i thërrasin mbledhjet konstituive të këtyre organeve, pavarësisht se ato janë shpallur nga UNMIK-u si ilegale.

Kryetari i komunës së Leposaviqit, Velimir Bojoviq, thotë se mbi bazën e ligjit serb, organet e reja do të konstituohen deri më 4 maj.

“Pres që Kuvendi komunal të mblidhet të mërkurën e ardhshme, ku do të bëhet verifikimi i mandateve dhe të fillohet me punët në ndërtimin e ekzekutivit”, thotë Bojoviq.

Edhe kryetari i Komunës së Zveçanit, Dragisha Milloviq, beson se nuk do të ketë vonesa në konstituimin e organeve komunale.

“Me siguri së në fund të kësaj jave apo në fillimin e javës tjetër do të thirret seanca konstituive e kuvendit komunal”, thotë Milloviq.

Për shkak të bojkotit që serbët u kanë bërë zgjedhjeve në Kosovë, në pesë komuna ku ata përbëjnë shumicën apo jetojnë në numër të konsiderueshëm, shefi i UNMIK-ut pati emëruar përfaqësuesit serbë.

Por, ata tani janë zgjedhur mbi bazën e zgjedhjeve serbe. Administrata e Kombeve të Bashkuara thotë se shefi i UNMIK-ut do t’i emërojë përfaqësuesit e rinj deri më 18 qershor, por nuk e ka idenë se cilët kandidat do t’i gjejë tash për t’ua dorëzuar funksionet.

“Shefi i UNMIK-ut ka për obligim që t’i emërojë përfaqësuesit e rinj serbë deri më 18 qershor. Ne do të bashkëpunojmë vetëm me këta të emëruar”, thotë zëdhënësi i UNMIK-ut, Alexander Ivanko.

Sidoqoftë, të zgjedhurit serbë nga procesi zgjedhor i Serbisë do t’i formojnë organet e reja pikërisht në ndërtesat e kuvendeve komunale. Pavarësisht se këto organe cilësohen si ilegale, as UNMIK-u dhe as Qeveria e Kosovës deri më tash nuk kanë dashur të flasin se si do të veprohet në këto raste, kur organet paralele ngritën në kuadër të objekteve të institucioneve publike të Kosovës.
  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

XS
SM
MD
LG