Ndërlidhjet

logo-print

Kuvendi do të dënojë krimet gjatë regjimit komunist


Kuvendi i Kosovës

Kuvendi i Kosovës

Kuvendi i Kosovës pritet që në një nga seancat e radhës të miratojë një rezolutë, përmes së cilës dënohen krimet e bëra në Kosovë gjatë regjimit komunist të ish-Jugosllavisë. Deputetët këtë e vlerësojnë edhe si dëshmi për synimin e vendit drejt BE-së.



Deputetët e Kuvendit të Kosovës e vlerësojnë si akt të rëndësishëm dhe të domosdoshëm nxjerrjen e një rezolute, me të cilën dënohen krimet që ish-regjimi komunist i Jugosllavisë ka bërë në Kosovë gjatë viteve 1945 deri më 1999.

Ata thonë se nxjerrja e një rezolute të tillë, ndonëse nuk mund të ketë ndikim praktik, të paktën teorikisht dëshmon synimin e vendit për të hequr dorë nga e kaluara, duke shkuar drejt një sistemi të mirëfilltë demokratik.

Kryetari i Grupit Parlamentar të Partisë Demokratike të Kosovës, i cili kishte iniciuar këtë kërkesë, Ramë Buja, vlerëson se rezoluta do të shërbejë si mjet për të dënuar para opinionit njerëzit e përfshirë në krimet e bëra gjatë periudhës komuniste në vend.

"Do të bëjmë krejt të mundshmen që shoqëria e kaluar e komunizmit të ndëshkohet në formën më të mirë të mundshme të kësaj logjike. Nuk është që mund të bëjë diçka praktike, por në aspektin teorik kjo do t'u rikujtojë njerëzve - gjithsesi po", tha Buja.

Sipas deputetit Buja, rezoluta do të dëshmonte synimin e Republikës së Kosovës për t'u integruar në strukturat euroatlantike.

"Është në vazhdën e përshkallëzimit pozitiv edhe në deklarimet, si dhe në veprimet konkrete, për të shkuar drejt Evropës dhe një sistemi të ri demokratik të mirëfilltë", shtoi ai.

Bashkimi Evropian u kishte kërkuar të gjitha shteteve që synonin anëtarësimin në BE, e që dikur kishin qenë pjesë e ish-Jugollavisë, hartimin e një rezolute, përmes së cilës dënohen veprimet e regjimit komunist ndaj popullit të vendit përkatës.

Nënkryetari i partisë opozitare Aleanca për Ardhmërinë e Kosovës, Ahmet Isufi, mendon se rezoluta që do të nxjerrë legjislativi kosovar mbi këtë çështje, duhet të jetë në përputhje edhe me rezolutat e shteteve të tjera, të cilat kanë krijuar një dokument të tillë.

"Kuvendi i Kosovës ka pasur një obligim që të nxjerrë një rezolutë të tillë, duke u bazuar edhe në të gjitha vendet post-komuniste, të cilat kanë dënuar krimet që kanë ndodhur. Prandaj, nxjerrja e një rezolute të tillë është shumë e arsyeshme, madje është dashur të bëhet edhe më herët",
vlerësoi Isufi.

Komisioni për Legjislacion dhe Kushtetutë i Kuvendit të Kosovës do të jetë përgjegjës për hartimin e rezolutës, e cila pritet të shqyrtohet edhe në një nga seancat e ardhme të këtij institucioni.

Këshilli i Evropës, në vitin 2006, kishte miratuar një rezolutë të këtij lloji, sipas së cilës dënoheshin sulmet kundër rreth 100 milionë viktimave të sistemit komunist në mbarë botën.

Trego komentet

XS
SM
MD
LG