Pas tensioneve të ngritura të ditëve të fundit në lagjen Kroi i Vitakut, në qetësimin e të cilave u desh intervenimi me gaz lotsjellës i Policisë së EULEX-it, autoritetet e rendit dhe të sigurisë në Mitrovicë thonë se e kanë situatën nën kontroll.
Ditët e fundit, ka pasur përpjekje të vazhdueshme të serbëve lokalë që të pengojnë ndërtimin e shtëpive për shqiptarët e zhvendosur. Madje, situata më e tensionuar ka qenë dje, ku ndaj EULEX-it dhe KFOR-it janë hedhur edhe granata dore.
Zëdhënësi i Policisë së Kosovës për rajonin e Mitrovicës, Besim Hoti, flet për një situatë të qetë gjatë ditës së martë. Ndërsa, nuk përjashton mundësinë e protestave të sërishme nga ana e serbëve lokalë.
“Ata nuk i paralajmërojnë, edhe më herët i kemi pasur këto tubime të paparalajmëruara, por policia ka ndërmarrë masat e veprimit sipas situatave të paraqitura në terren”, thotë Hoti.
Presidenti i Kosovës, Fatmir Sejdiu, përmes një komunikate për media, ka thënë se shkaktarët e incidenteve në veri janë të dirigjuar drejtpërdrejt nga Beogradi. Ai ka thënë se nevojitet një presion i shtuar i bashkësisë ndërkombëtare që Serbia ta ndalë qasjen konfliktuoze ndaj fqinjëve të vet.
Por, të mbledhur në të ashtuquajturin Shtab i Krizës i Mitrovicës, strukturë kjo paralele, serbët kanë deklaruar se nuk do të ndalen së protestuari kundër ndërtimit të shtëpive të shqiptarëve në lagjen Kroi i Vitakut, që gjendet në veri.
“Ftojmë qytetarët që sa më masovikisht të mblidhen, por që këto protesta të jenë paqësore. Do të kërkojmë nga përfaqësuesit e qeverisë sonë (të Serbisë), që të ndikojnë politikisht te përfaqësuesit e EULEX-it dhe KFOR-it, për të mos krijuar ndonjë situatë të padëshiruar”, tha Nenad Topliçeviq, njëri nga liderët serbë të Mitrovicës.
Megjithatë, autoritetet kosovare janë të vendosura që t’i kryejnë punimet e nisura në rindërtimin e shtëpive të rrënuara gjatë luftës, pronarët e të cilave janë shqiptarë të zhvendosur në jug të qytetit.
Zëdhënësi i Kuvendit Komunal të Mitrovicës, Ahmet Jashari, konfirmon se punimet po zhvillohen sipas ritmit të paraparë.
“Pas incidenteve që kanë ndodhur dy ditë më parë, sot gjendja në Mitrovicë është e qetë. Punimet kanë filluar si zakonisht në orën tetë të mëngjesit, në ndërtimin e shtatë shtëpive të djegura dhe shkatërruara gjatë kohës së luftës. Ne, si pushtet lokal, jemi të vendosur që punimet të vazhdojnë pa ndërprerje”, theksoi Jashari.
Vitin e kaluar, pikërisht në lagjen Kroi i Vitakut, për shkak të kundërshtimit serb, qe bërë problematik rindërtimi i shtëpisë së një pronari shqiptar, Ali Kadriut. Ai qe ndaluar nga njësitë e policisë së UNMIK-ut.
Po vitin e kaluar, probleme të natyrës së njëjtë ka pasur edhe me ndërtimin e ujësjellësit në Suhodoll. Kësaj radhe, për të vazhduar punimet pa ndërprerje, është dashur të shtohet prania e forcave te sigurisë te Kroi i Vitakut. Besim Hoti, nga Polica e Kosovës, shpjegon:
“Për këtë është dashur të ngremë masa të sigurisë dhe praninë policore, por në raste edhe t’i bëjmë kërkesë KFOR-it për të qenë në vendngjarje, ashtu që masat e sigurisë të jenë në nivel të duhur, ndërsa punimet të kryhen pa probleme. Kjo sigurisht ka qenë situatë e parashikueshme, meqë gjithmonë ka pasur reagime të tilla kur është tentuar të rindërtohen shtëpitë në lagjet e përziera etnikisht”, shprehet Hoti.
Misioni evropian për sundimin e ligjit i ka dënuar incidentet e shkaktuara në pjesën veriore të Mitrovicës dhe u ka bërë thirrje qytetarëve për përmbajtje. Përmes një komunikate për media, EULEX-i ka theksuar se në incidentet në pjesën veriore të Mitrovicës janë lënduar disa njerëz, si dhe mbi forcat e EULEX-it dhe atyre të KFOR-it janë hedhur dy bomba dore.