Ndërlidhjet

Emocione nga vizita e Bajdenit


Qytetarët e Prishtinës i dëshirojnë mirëseardhjen zotit Bajden...

Qytetarët e Prishtinës i dëshirojnë mirëseardhjen zotit Bajden...

Qytetarët e Kosovës, vizitën e nënpresidentit amerikan, Xhozef Bajden, e kanë cilësuar si një nga vizitat më të rëndësishme që i është bërë Kosovës që nga shpallja e pavarësisë. Ata thonë se me ardhjen e numrit dy të Shteteve të Bashkuara të Amerikës, është konfirmuar edhe një herë mbështetja që është duke iu bërë Kosovës.


Shefki Jashari thotë se vizita e nënpresidentit Bajden është një vizitë historike dhe nder i madh që i është bërë Republikës së Kosovës.

“Edhe një herë e vërtetoi me fjalën e tij që Kosova do të jetë e pandarë dhe se njohja e pavarësisë është e pakthyeshme. Është me rëndësi për ne të rikonfirmohet prapë kjo mbështetje nga administrata amerikane”, thotë Jashari.

Rabit Gashi, ndërkaq, thekson se zoti Bajden u prit si hero në Kosovë, ashtu siç edhe e ka merituar.

“Besoj që nënpresidenti Bajden ka ardhur me një porosi për udhëheqësit e institucioneve të Kosovës. Ne duhet t’i zbatojmë dhe t’i dëgjojmë se me siguri që SHBA-të do të na përkrahin edhe në të ardhmen, dhe për këtë ne duhet t’i respektojmë sugjerimet dhe idetë e tyre”, thotë ai.

Aurora Beqiri thotë se ndihet shumë e lumtur.

“Unë, ardhjen e nënpresidentit Bajden në Kosovë e shoh si një ngjarje mjaft të madhe për ne. Besoj që edhe në të ardhmen nënpresidenti do të ndihmojë në zhvillimin e Kosovës”,
u shpreh ajo.

Xhevat Simnica, një tjetër qytetar, shprehet i bindur se kjo vizitë do të ndikojë në hapjen e rrugëve të Kosovës drejt Bashkimit Evropian.

“Është një vizitë, e cila na jep shpresë për zhvillimin e Kosovës në të gjitha sferat. Bajden është miku më i madh i Kosovës”, thotë Simnica.

Ndërkaq, Avdush Morina mendon se një vizitë e tillë do të sjellë stabilitet në rajon.

“Ai është i mirëseardhur; e konsiderojmë mikun më të madh të Kosovës. Mendoj që politika amerikane duhet të mos ndryshojë karshi Kosovës”, thotë ai.

Edhe Osman Vitia, vizitën e nënpresidentit Xhozef Bajden e konsideron si mbështetje dhe përkrahje për shtetin e Kosovës.

“E gjithë Kosova e priti këtë njëri të çmueshëm, përkrahësin më të madh të pavarësisë së Kosovës, njeriun i cili mbrojti interesat e kosovarëve. Është ditë shumë e veçantë për ne si popull. Kësaj here në ditëm të presim një nënpresident ashtu si duhet”, u shpreh Vitia.

Ndryshe, numri dy i Shteteve të Bashkuara të Amerikës, Xhozef Bajden, po qëndron për një vizitë zyrtare në Kosovë.
  • 16x9 Image

    Luljeta Krasniqi - Veseli

    Luljeta Krasniqi, e lindur më 02.05.1981. Me gazetari ka filluar të merret që nga viti 2005. Për një kohë të gjatë ka punuar si gazetare në Agjencinë e lajmeve Kosovalive. Ekipit të Radios Evropa e Lirë i është bashkuar në vitin 2008.

XS
SM
MD
LG