Ndërlidhjet

Procesi i njohjes së Kosovës nuk do të lidhet me mendimin këshillëdhënës të GJND-së dhe mendimi këshillëdhënës do të jetë në favor të Kosovës, ka deklaruar sot zëvendëskryeministri Hajredin Kuçi.




Procesi i interpretimit të shpalljes së pavarësisë së Kosovës në Gjykatën Ndërkombëtare të Drejtësisë nuk do të jetë pengesë e njohjeve të reja, thonë zyrtarët e Qeverisë së Kosovës.

Zëvendëskryeministri Hajredin Kuçi beson se shpallja e pavarësisë ishte në harmoni me të drejtën ndërkombëtare dhe pret që ky të jetë edhe konkluzion i Gjykatës Ndërkombëtare të Drejtësisë në Hagë.

Kuçi thotë se shumë shtete themeluese të kësaj gjykate e kanë njohur Kosovën dhe këtë do ta bëjnë edhe vende tjera, pavarësisht procesit në GJND.

“Nuk do të donim që ky mendim këshillëdhënës i Gjykatës Ndërkombëtare të Drejtësisë të jetë pretekst për askënd që ta njohë pavarësinë e Kosovës. Ju e dini që Kosovën e kanë njohur edhe ato shtete, të cilat e kanë themeluar këtë Gjykatë Ndërkombëtare të Drejtësisë”.

“Dhe, unë jam shumë i bindur që procesi i njohjes së Kosovës nuk do të lidhet me atë mendim këshillëdhënës, sikur që jam shumë i bindur se mendimi këshillëdhënës do të jetë në favor të së drejtës që i takon Kosovës”,
theksoi Kuçi.

Këto komente, zëvendëskryeministri Kuçi i bëri pas një takimi që zhvilloi me një delegacion nga vendet arabe, që po qëndron nga dita e djeshme në Kosovë.

Zëvendëskryeministri Kuçi i ka ftuar sërish edhe 18 shtetet arabe që nuk e kanë njohur Kosovën, që ta bëjnë këtë në të ardhmen e afërt, pa u ndikuar në procesin e Hagës.

Duke u ndërlidhur me procesin në GJND, deputeti në Parlamentin e Egjiptit, Gamal Zahran, përgënjeshtroi njoftimet se vendi i tij ka deponuar deklaratë në kundërshtim të pavarësisë së Kosovës tek GJND-ja dhe u shpreh sërish i bindur se Egjipti do ta njohë Kosovën pavarësisht kundërshtimeve të Serbisë.

“Natyrisht që populli i Egjiptit nuk do të jetë koprrac dhe do ta përkrahë dhe njohë Kosovën e pavarur”, tha Gamal Zahran.

Gjykata Ndërkombëtare e Drejtësisë ka konfirmuar se do të mbajë dëgjime publike nga 1 dhjetori për t’i dëgjuar mendimet e të gjitha palëve të interesuara rreth asaj se ishte apo jo shpallja e pavarësisë së Kosovës në harmoni me të Drejtën Ndërkombëtare.

Sipas GJND-së, deri tash, 36 vende kanë paraqitur deklarata me shkrim lidhur me këtë çështje. Deklarata të tilla kanë paraqitur edhe Kosova dhe Serbia - si dy palët kryesore në proces.

Shtetet që duan të marrin pjesë në këtë fazë përfundimtare të procesit, përfshirë edhe Kosovën, duhet të bëjnë kërkesë në Gjykatën e Drejtësisë deri më 15 shtator. Sipas deklarimeve të palës kosovare, procesi në Hagë mund të përmbyllet me një mendim këshillëdhënës deri në prill të vitit të ardhshëm.
  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

Trego komentet

XS
SM
MD
LG