Ndërlidhjet

Procesi në GJND vonon njohjet


Gjykata Ndërkombëtare e Drejtësisë

Gjykata Ndërkombëtare e Drejtësisë

Zyrtarë nga Ministria e Punëve të Jashtme zotohen se procesi i ligjshmërisë së pavarësisë së Kosovës në GJND do të jetë në favor të Kosovës, përderisa pranojnë se kjo çështje po vonon njohjet e reja të shtetësisë së vendit.


Përfaqësues nga Ministria e Punëve të Jashtme dhe ata të partive opozitare në Kosovë thonë së procesi i interpretimit të ligjshmërisë së pavarësisë së Kosovës nga Gjykata Ndërkombëtare e Drejtësisë po ndikon në njohjet e reja të shtetësisë së vendit.

Zëvendësministrja e Punëve të Jashtme, Vlora Çitaku, thotë se pavarësisht kësaj, Kosova ka fituar një numër të konsiderueshëm të njohjeve. Sipas saj, ky numër do të rritet edhe më shumë pas dhënies së opinionit të GJND-së për pavarësinë e Kosovës.

“Të thuhet se procesi në GJND nuk ka pasur ndikim, do të ishte joserioze. Gjithsesi, edhe pas kalimit të rezolutës serbe në Asamblenë e Përgjithshme të Kombeve të Bashkuara, njohjet kanë vazhduar”.

“Ne, gjatë kësaj periudhe, kemi pasur shumë njohje të fuqishme nga vende të ndryshme anekënd botës. Ka edhe shtete, të cilat duan t’i respektojnë procedurat në GJND dhe kanë rezervuar qëndrimin e tyre në raport me Kosovën, derisa të përmbyllet ky proces”,
thotë Çitaku.

Nga ana tjetër, Ahmet Isufi, nga Aleanca për Ardhmërinë e Kosovës, shpreh bindjen se Kosovës i duhet një angazhim më i madh në lidhje me këtë çështje. Procesi në GJND, thotë Isufi, Kosovës po i kushton me vonesë të njohjeve të reja.

“Bazuar në disa veprime që i ka bërë Serbia, qoftë në qarqet diplomatike, por po ashtu edhe në Gjykatën e Hagës, dhe elemente që shpeshherë i kanë përdorur, kanë ndikuar që Kosova të ecë me një ritëm më të ngadalshëm
”, shprehet Isufi, duke kritikuar institucionet vendore për mosangazhim të të gjitha kapaciteteve relevante që do të mund të ndihmonin në këtë rast.

Ahmet Isufi
“Nuk kemi dyshim që GJND do të veprojë drejt. Por, e meta jonë është se nuk po i mbledhim kapacitetet e mjaftueshme për ta bindur botën në kuptimin e një vendimi të asaj se çka ka ndodhur në Kosovë”,
thotë Isufi.

Procesi i interpretimit të pavarësisë nga Gjykata Ndërkombëtare e Drejtësisë është iniciuar nga Serbia dhe miratuar nga Asambleja e Përgjithshme e Kombeve të Bashkuara.

Megjithatë, zëvendësministrja Çitaku beson se shpallja e pavarësisë ishte në harmoni me të drejtën ndërkombëtare dhe pret që ky të jetë edhe konkluzion i GJND-së në Hagë.

“Ju e dini që institucionet e Kosovës e kanë marrë shumë seriozisht çështjen në Gjykatën Ndërkombëtare të Drejtësisë, ndonëse ne kemi deklaruar shumë herë që pavarësia e Kosovës është e pakthyeshme dhe GJND-ja nuk do të marrë një vendim, por një opinion këshillëdhënës dhe ne i kemi dhënë rendësi maksimale këtij procesi”.

“Kemi angazhuar një ekip të jashtëzakonshëm këshilltarësh ndërkombëtarë, njohës dhe profesionistë shumë të denjë të kësaj çështjeje, të cilët kanë punuar në koordinim të ngushtë me institucionet e Kosovës dhe me grupet e ekspertëve këtu. Besojmë që kemi arritur të argumentojmë fuqishëm ligjshmërinë e Kosovës”,
thotë Çitaku.

Gjykata Ndërkombëtare e Drejtësisë tashmë ka përfunduar me dy fazat e proceduarave të deponimit të deklaratave të palëve për Kosovën. Faza e parë është përmbyllur më 17 prill, kur palët kanë deponuar qëndrimet e tyre, e po ashtu edhe shtetet tjera të interesuara.

Ndërsa, 17 korriku ka qenë afati i dytë, kur shtetet që kanë deponuar deklarata, kanë mundur të bëjnë reagime në deklaratat e shteteve të tjera.

Sipas zëvendësministres së Punëve të Jashtme të Kosovës, Gjykata Ndërkombëtare e Drejtësisë tashmë ka konfirmuar se do të mbajë dëgjime publike, për t’i dëgjuar mendimet e të gjitha palëve të interesuara rreth asaj se a ishte apo jo shpallja e pavarësisë së Kosovës në harmoni me të drejtën ndërkombëtare.
Ne besojmë që verdikti, gjegjësisht opinioni këshillëdhënës i GJND-së, do të jepet në pranverën e hershme të vitit të ardhshëm.

“GJND tashmë ka marrë vendim që të ketë edhe seanca gojore, seanca këto që do të fillojnë në fund të vjeshtës. Ne besojmë që verdikti, gjegjësisht opinioni këshillëdhënës i GJND-së, do të jepet në pranverën e hershme të vitit të ardhshëm”, shpreh bindjen Çitaku.

Sipas GJND-së, deri tash, 36 vende kanë paraqitur deklarata me shkrim lidhur me këtë çështje. Deklarata të tilla kanë paraqitur edhe Kosova dhe Serbia - si dy palët kryesore në proces. Shtetet që duan të marrin pjesë në këtë fazë përfundimtare të procesit, përfshirë edhe Kosovën, duhet të bëjnë kërkesë në Gjykatën e Drejtësisë deri më 15 shtator.
  • 16x9 Image

    Arton Konushevci

    Arton Konushevci merret me gazetari që nga viti 2001. Në vitin 2007 ka filluar të punojë si korrespondent i Radios Evropa e Lirë. Jeton në Prishtinë, është i martuar dhe ka dy fëmijë.

Trego komentet

XS
SM
MD
LG