Ndërlidhjet

Komisioni për Siguri të Brendshme në Kuvendin e Kosovës njofton se do ta ngrejë për diskutim çështjen e nënshkrimit të protokollit të paralajmëruar ndërmjet EULEX-it dhe Serbisë. Deputetët kosovarë thonë se Kuvendi, si organi më i lartë ligjvënës, duhet ta thotë fjalën e vet lidhur me këtë protokoll.


Kuvendi i Kosovës duhet të merret me çështjen e protokollit të paralajmëruar ndërmjet EULEX-it dhe Serbisë, thonë deputetët kosovarë.

Sipas tyre, Kuvendi dhe institucionet madje janë vonuar me reagimin e tyre, pasi që bëhet fjalë për një marrëveshje që implikon Kosovën.

Kryetari i Komisionit Parlamentar për Siguri të Brendshme në Kuvend, Rrustem Mustafa, thotë se ky komision do të mblidhet më 2 shtator për të diskutuar edhe çështjen e protokollit.

Ai thotë se forma e reagimit të Kuvendit duhet të diskutohet deri në gjetjen e një deklarimi adekuat. Sidoqoftë, nënvizon deputeti Mustafa, Kuvendi duhet ta thotë fjalën e vet.
Kuvendi i Kosovës duhet të merret dhe është organi më i thirrur për t’u marrë me këtë punë...

“Kuvendi i Kosovës duhet të merret dhe është organi më i thirrur për t’u marrë me këtë punë. Ne gjendemi para një momenti të vonuar, sikurse edhe herëve tjera. Ky reagim është dashur të vijë nga institucione e mekanizma vendorë kur është nënshkruar një protokoll i tillë me Shqipërinë. Tash të shohim se si duhet të reagohet”, thotë Mustafa.

Ai pohon se këtu ka dy pikëpamje: nëse EULEX-i vendos që të nënshkruajë në emër të Bashkimit Evropian, atëherë ai parasheh që një marrëveshje e tillë duhet të nënshkruhet edhe me Ministrinë e Punëve të Brendshme të Kosovës; kurse, në rast se pretendohet që të nënshkruhet në emër të Kosovës, atëherë, sipas Mustafës, akterë në të duhet të jenë vetë institucionet.

“Nëse është puna ashtu siç po thuhet nga EULEX-i, se ata po shkojnë dhe nënshkruajnë marrëveshje në emër të Bashkimit Evropian, që kanë të drejtë, atëherë ne duhet të bëjmë përpjekje që kjo marrëveshje të nënshkruhet në rend të parë me Ministrinë e Punëve të Brendshme të Republikës së Kosovës, pastaj edhe me shtetet në rajon”, thekson Mustafa.

Ndërkohë, deputeti opozitar nga radhët e Aleancës për Ardhmërinë e Kosovës, Ahmet Isufi, thotë se Kuvendi i Kosovës e ka për obligim kushtetues që të reagojë. Meqë nënshkrimi është paralajmëruar të bëhet me Serbinë si vend fqinj, Kuvendi nuk mund të rrijë indiferent, por duhet të reagojë dhe të mbrojë Kushtetutën e Kosovës, thotë Isufi.

Ahmet Isufi
“Kuvendi i Kosovës duhet të ketë qëndrim rreth nënshkrimit të protokollit që e ka paralajmëruar EULEX-i me Serbinë. Parlamenti, duke qenë institucioni më i lartë në Kosovë, ka obligim që të merret me këtë çështje. Duke qenë se nënshkrimi bëhet me Serbinë, me një shtet fqinj, atëherë është obligim i Kuvendit që të mbrojë Kushtetutën”,
deklaron Isufi.

Deputeti Ahmet Isufi pret që në një prej seancave të para gjatë shtatorit, kur Kuvendi rifillon punën pas pushimeve, ta shqyrtojë këtë protokoll dhe ai hedh poshtë mundësinë që EULEX-i të nënshkruajë marrëveshje me vendet tjera pa autoritetet e Kosovës.

“Përgjigjja e Kuvendit do të duhej të ishte JO nënshkrimit të kujtdo qoftë në Kosovë jashtë institucioneve të Kosovës, të ndërtuara mbi bazën e draftit të Ahtisarit dhe mbi nivelin më të lartë të Kushtetutës së vendit”,
thotë Isufi.

Ndryshe, pavarësisht kundërshtimeve të institucioneve të Kosovës, EULEX-i ende nuk ka deklaruar se do të tërhiqet nga ky protokoll. Por, zyrtarët e këtij misioni në vazhdimësi kanë përsëritur se EULEX-i nuk do të nënshkruajë në emër të Kosovës dhe se ky mision nuk do të nënshkruajë marrëveshje në kundërshtim me interesat e popullit të Kosovës.

Sidoqoftë, mbetet të shihet se cili do të jetë qëndrimi përfundimtar i EULEX-it, i cili në Kosovë ka mandatin e misionit për sundim të rendit dhe ligjit.
  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

Trego komentet

XS
SM
MD
LG