Një grup prej 88 ushtarëve spanjollë arriti sot në aeroportin ushtarak në Madrid. Ky ishte grupi i fundit i trupave spanjolle, që u kthyen nga Kosova, ku shërbenin në kuadër të misionit paqeruajtës KFOR, të udhëhequr nga NATO-ja.
Kështu, Spanja u bë vendi i parë, që në tërësi i tërhoqi ushtarët e saj nga Kosova.
Agjencia DPA nga Madridi raporton se vendimi i Spanjës për tërheqje nga Kosova ishte kritikuar nga disa aleatë të NATO-s.
Misioni ushtarak spanjoll, që shërbeu në kuadër të KFOR-it në Kosovë, ishte i përbërë nga 630 vetë.