Kryenegociatori iranian, Sajed Xhalili, tha se Irani do të hyjë në bisedimet me gjashtë fuqitë botërore me “vullnet të mirë”.
Ai tha se bisedimet me anëtarët e përhershëm të Këshillit të Sigurimit: Shtetet e Bashkuara, Britaninë, Francën, Rusinë dhe Kinën, si dhe Gjermaninë, do të jenë një “mundësi” për fuqitë botërore.
Xhalili i bëri këto komente në Teheran para nisjes për në takimin e nesërm në Gjenevë.
Shtetet e Bashkuara dhe aleatët e Perëndimit duan t’i diskutojnë aktivitetet iraniane për pasurimin e uraniumit, për të cilin dyshojnë se synon zhvillimin e armëve bërthamore.
Irani ka thënë se është i gatshëm të diskutojë çështjet e sigurisë dhe të mos-proliferimit, por është zotuar se nuk do të heqë dorë nga ajo që e quan “të drejtën” e vet bërthamore.