Ndërlidhjet

Mitrovicë: Sulmohet kandidati i AAK-së


Përditësimi i fundit: 12.11.2009 22:49

Persona ende të panjohur kanë sulmuar me armë zjarri kandidatin e Aleancës për Ardhmërinë e Kosovës për kryetar komune në Mitrovicë, Hysni Ahmeti.

Zëdhënësi i Policisë së Kosovës në këtë qytet, Besim Hoti, ka thënë se zoti Ahmeti ishte i vetëm në automjetin e tij, kur persona të panjohur kryen sulmin.

“Më shumë se një plumb i shkrepur ka goditur automjetin. Zoti Ahmeti nuk ka pësuar lëndime”, ka thënë zëdhënësi i policisë, Besim Hoti, duke shtuar se organet e rendit janë duke zhvilluar hetime.

Presidenti i Republikës së Kosovës, Fatmir Sejdiu, në një komunikatë për shtyp, e ka dënuar sulmin ndaj zotit Ahmeti, duke e thënë se “ky akt, njësoj sikurse ai i mbrëmshmi në Deçan, është një përpjekje e ligë për ta njollosur procesin e mirë parazgjedhor që kanë zhvilluar partitë politike, kandidatët e pavarur dhe të gjithë qytetarët anekënd Kosovës”.

Ai u ka bërë thirrje të gjithë liderëve politikë që “të ndikojnë te anëtarësia dhe simpatizantët e partive të tyre, në mënyrë që t’u shmangen akteve të tilla, të cilat bien ndesh me ligjin dhe janë në kundërshtim të plotë me kulturën demokratike”.

Partia e zotit Hyseni, Aleanca për Ardhmërinë e Kosovës, nuk ka dashur “të paragjykojë motivet apo kryesit e kësaj tentimvrasjeje” dhe e ka cilësuar këtë akt si “një sulm të drejtuar jo vetëm kundër jetës së zotit Ahmeti, por edhe kundër Mitrovicës, kundër procesit të qetë dhe dinjitoz parazgjedhor dhe kundër Kosovës”.
XS
SM
MD
LG