Të paktën tetë persona, gjashtë prej tyre fëmijë, e humbën jetën, dhe rreth 40 vetë u plagosën nga shpërthimi në një shkollë në Bagdad.
Zëdhënësi i forcave irakiane të sigurisë tha se shkaku i shpërthimit nuk ishte bomba, por kishte shpërthyer një arkë me municion e vendosur në shkollë.
Incidenti ndodhi në lagjen Sadr City, kryesisht e banuar me shiitë në verilindje të kryeqytetit irakain.
Gjeneral majori Kasim Ata i fajësoi milicitë shiite për fshehjen e armëve në shkollë, por nuk tha se çfarë e kishte nxitur shpërthimin.
Raporte të pakonfirmuara thanë se punonjësit e shkollës u kishin vënë zjarrin hedhurinave në afërsi, duke nxitur ndoshta shpërthimin e municionit.