Ndërlidhjet

logo-print

Berisha\Bukoshi: PDK – LDK, koalicion i paqëndrueshëm


Qeveria e Kosovës

Qeveria e Kosovës

Gara e ashpër elektorale për pushtetin lokal mes PDK-së e LDK-së po zgjerohet dhe në nivelin qendror. Deputeti i PDK-së, Zafir Berisha, dhe ai i LDK-së, Bujar Bukoshi, shprehen pro shpalljes së zgjedhjeve të parakohshme dhe prishjes së këtij koalicioni.


Koalicioni qeveritar ndërmjet Partisë Demokratike të Kosovës dhe Lidhjes Demokratike të Kosovës po bëhet gjithnjë e më i paqëndrueshëm, thonë deputetët e këtyre dy partive politike.
Si zyrtarë të PDK-së, ashtu edhe ata të LDK-së, besojnë se me pranverën e vitit 2010, Kosova mund të shtrëngohet të shpallë zgjedhje të parakohshme parlamentare, për shkak të krizës qeveritare, që ata e parashohin.

Zafir Berisha, deputet i PDK-së, dhe kryetar i degës së kësaj partie në Prizren, thotë se zhvillimet në procesin e fundit zgjedhor dhe ato rreth balotazhit kanë dëshmuar se PDK-ja dhe LDK-ja nuk janë parti që mund të qeverisin edhe pas shpalljes së pavarësisë.

Me deklarimin e pavarësisë dhe ruajtjen e stabilitetit në Kosovë, ky koalicion e ka përfunduar punën e vet, thotë Berisha i PDK-së.
PDK-ja dhe LDK-ja në koalicion, është shumë e pakuptimtë...

“Detyrën, ky koalicion e ka kryer me shpalljen e pavarësisë së Kosovës dhe, thjesht, PDK-ja dhe LDK-ja në koalicion është shumë e pakuptimtë. Unë e them këtë si deputet. E kam thënë edhe atëherë (2007) dhe vazhdoj ta them”.

“Megjithatë, ia lëmë kohës dhe besoj se pranvera do të jetë shumë e favorshme për t’i parë gjërat se si do të rrjedhin, se, si zakonisht, gjërat e mëdha te shqiptarët ndodhin në pranverë”,
thotë Berisha.

Ndërkohë, edhe deputeti i LDK-së, Bujar Bukoshi, vlerëson se koalicioni aktual është në krizë dhe se nuk po funksionon.

Sipas Bukoshit, gjendja është tejet alarmuese dhe duhet të ketë një vlerësim politik se a mund të rikuperohet diçka me riformatizimin e tij apo me shpalljen e zgjedhjeve të lira.

“Qeverisja nuk ka treguar kurrfarë performance ose fare pak performancë. Kemi një varg të defekteve, të cilat alarmojnë”.

“Kjo qeveri ose ky koalicion duhet të rikonsiderohet, të shihet se a ka masa të mundshme për ta sanuar gjendjen, për të cilën unë, personalisht, mendoj se është mjaft vështirë
”, shprehet Bukoshi.

Deputeti Bukoshi thotë se mosfunksionimi i qeverisë i kushton shumë zhvillimit të Kosovës, si dhe aspiratave të saj integruese evropiane. Mes opsionit të rikonfigurimit dhe zgjedhjeve të parakohshme, Bukoshi beson se zgjedhjet janë zgjidhja më e mirë.
Për mua opsioni më i mirë është organizimi i zgjedhjeve të parakohshme parlamentare.

“Dy muajt e fundit, ne jemi dëshmitarë të disa zhvillimeve, të cilat katërçipërisht flasin se koalicioni qeveritar ose ky koalicion i madh duhet ose të rikonsiderohet, ose të organizohen zgjedhjet e parakohshme parlamentare”.

“Për mua opsioni më i mirë është organizimi i zgjedhjeve të parakohshme parlamentare”,
thotë Bukoshi.

Në anën tjetër, deputeti i PDK-së, Zafir Berisha, thotë se Prizreni është vetëm një nga arsyet që, sipas tij, dëshmojnë se ky koalicion nuk është më funksional.

Ai e përjashton çdo mundësi që, për hir të ruajtjes së koalicionit qeveritar, PDK-ja dhe LDK-ja të merren vesh për ndarjen e posteve në nivelin komunal.

“Në asnjë mënyrë, ne nuk jemi duke bërë pazar dhe ne votën e qytetarëve të Prizrenit nuk mund ta fusim tash në pazare politike”.

“Unë besoj se asnjë parti politike dhe as PDK-ja nuk do të lejojë që thjesht të bëhet pas perdeve ndonjë pazar rreth Prizrenit, sepse, në fund të fundit, për atë mbahen zgjedhjet. Qytetari e thotë fjalën e vet dhe ne e respektojmë fjalën e qytetarit”,
thekson Berisha.

Nënshkrues të marrëveshjes për koalicionin qeverisës janë: kryeministri, përkatësisht kryetari i PDK-së, Hashim Thaçi, dhe presidenti i Kosovës, i cili mban edhe postin e ngrirë të kryetarit të LDK-së, Fatmir Sejdiu.

Ndërsa Thaçi nuk e ka përjashtuar rikonfigurimin e qeverisë së tij me disa freskime dhe ndërrime të ministrave, Sejdiu nuk ka pranuar, në asnjë rast, të flasë për këtë çështje, duke ia adresuar përgjigjen partisë së tij, LDK-së.

Sidoqoftë, në koalicionin qeverisës tashmë vlerësohet se ka ndikuar mjaft shumë sjellja e disa zyrtarëve të LDK-së gjatë fushatës, pastaj deklarimi i prishjes së koalicionit nga ana e zyrtarëve të PDK-së, si dhe rasti tashmë shumë i përfolur “Bllaca” dhe dëshmitë e akuzat e tij përmes disqeve publike.
  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

Trego komentet

XS
SM
MD
LG