“Lëvizja qytetare ‘Zgjohu’ kërkon nga Ministria e Kulturës të ndërtojë shtëpinë e “Nënë Terezës” në formë autoktone në vendin, ku aktualisht gjendet vetëm një pllakë përkujtimore”.
“Këmbëngulim që të ndërtohet ‘Burmali xhamia’, në vendin ku ka ekzistuar ajo para se të rrënohet; dhe e treta, kërkojmë të ndërtohen monumente dhe përmendore të figurave të ndritura të historisë shqiptare”, thekson Bekim Hoxha nga Lëvizja qytetare “Zgjohu”.
Ndërkohë, partitë politike shqiptare vlerësojnë se përjashtimi i identitetit shqiptar, në ndërtimet e reja, që tashmë kanë filluar të ndërtohen në kryeqendër, është i rrezikshëm dhe tensionon raportet ndëretnike në vend.
Deputetja e Bashkimit Demokratik për Integrime, si pjesë e Qeverisë, Ermira Mehmeti, thotë se esenca e projektit “Shkupi 2014”, është shkaktimi i përçarjeve në shoqërinë e Maqedonisë.
“Element tjetër shumë alarmant është fakti se partia më e madhe maqedonase në pushtet, VMRO-DPMNE, përpiqet të përçojë një mesazh që në esencë ka të bëjë me natyrën e shtetit dhe organizimin e tij”.
“Në fakt, ideja është që të tregohet se cili është këtu populli dominues. Qasja e këtillë është tejet shqetësuese për perspektivat për të ndërtuar dhe ruajtur shtetin e përbashkët”, thotë deputetja Ermira Mehmeti.
Ndërkaq, Partia Demokratike Shqiptare e udhëhequr nga Menduh Thaçi vlerëson se hovi i qeverisjes aktuale, e cila nuk lë hapësirë për realizimin e interesave të shqiptarëve, mund të ndalet, vetëm me organizimin e zgjedhjeve të parakohshme.
Ndërkohë, Demokracia e Re në opozitë vlerëson se realizimi i projekteve që identifikohen vetëm me kulturën dhe historinë maqedonase, tensionon raportet edhe ashtu të rënduara ndëretnike.
“Qytetarët e Maqedonisë çdo ditë e më shumë i ndiejnë pasojat e tendencës për të treguar se Maqedonia është shtet mono-etnik dhe mono-fetar”.
“Çdo tentativë për të prishur këtë balancë të shtetit multi-etnik, nuk shkon në favor të Maqedonisë dhe qytetarëve të saj”, shprehet zëdhënësi i Demokracisë së Re, Arianit Hoxha.
Ndryshe, paralajmërimet për përkeqësimin e situatës ndëretnike dhe asaj politike përputhen edhe me porositë që gjithnjë e më shumë vijnë nga diplomatë të lartë evropianë.
Sipas tyre, Maqedonia mund të përfshihet në një periudhë jostabiliteti, nëse lidershipi i vendit nuk heq dorë nga investimi i projekteve antike dhe, përfundimisht, nuk fokusohet në zgjidhjen e çështjes së emrit, si dhe në debllokimin e procesit të integrimit në strukturat Euro-atlantike.
