Të gjithë zyrtarët e lartë të Kosovës që nga marsi e tutje do të jenë të obliguar edhe me ligj ta deklarojnë pasurinë e tyre.
Kryetari i Komisionit parlamentar për legjislacion dhe gjyqësi, Bahri Hyseni, thotë se Ligji për deklarimin e pasurisë, kontrollin, prejardhjen dhe dhuratat e zyrtarëve të lartë publikë, pasi është miratuar, do të jetë në fuqi në muajin mars.
Sipas tij, ligji i miratuar nga Kuvendi i Kosovës është i standardeve evropiane.
“Ligji është miratuar nga Kuvendi. Ka qenë një ligj që e kemi bërë prej fillimit, i ka mbi 30 amendamente. E kemi punuar në mënyrë shumë rigoroze dhe është punuar sipas standardeve”.
“Madje, ne i kemi tejkaluar ato, sepse një pjesë e shteteve të Bashkimit Evropian nuk e deklarojnë pasurinë ashtu siç e kemi paraparë ne me këtë ligj. Projektligji duhet të kalojë nëpër katër komisione”, thotë Hyseni.
Kërkesë që ligji të hyjë në fuqi, sa më parë, ka bërë edhe Agjencisë Kosovare Kundër Korrupsionit.
Zyrtarët e kësaj agjencie thonë se ligji duhet të jetë në fuqi para 31 marsit, datë kjo që njëherësh është përcaktuar si afati i fundit për deklarimin e pasurisë.
Drejtori i Agjencisë Kosovare Kundër Korrupsionit, Hasan Preteni, thotë:
“Jam shumë i bindur që pas aprovimit nga Kuvendi i Kosovës, ligji do të hyjë në fuqi shumë shpejt. Afati që presidenti i shtetit ta dekretojë këtë ligj është tetë ditë dhe mendoj që gjithçka do të jetë në rregull dhe se ligji do të hyjë në fuqi nga mesi i muajit të ardhshëm”.
“Afati për deklarimin e pasurisë mbetet 31 marsi. Agjencia tashmë i ka ndërmarrë të gjitha masat përgatitore, teknike, që deklarimi i pasurisë të realizohet me kohë dhe në formën e duhur”.
“Gjatë prillit do të përfundojë pjesa teknike, kurse nga 1 maji shpresoj që qytetarët do të kenë qasje në të gjitha deklarimet e personave zyrtarë të lartë për pasurinë që posedojnë”, sqaron Preteni.
Preteni konsideron se hyrja në fuqi e Ligjit për deklarimin e pasurisë do të jetë një hap tjetër në parandalimin dhe luftimin e korrupsionit në vend.
“Ky është një aktivitet që ka të bëjë me parandalimin e korrupsionit. Agjencisë i shtohet një punë ‘shtesë’ në pjesën teknike. Mirëpo, në anën tjetër fitohet një transparencë e kërkuar edhe nga mediat, nga shoqëria civile dhe praktika e shteteve që këto deklarime i bëjnë publike. Mendoj që në drejtim të transparencës do të ketë shumë progres”, thekson Preteni.
Ligji për deklarimin dhe prejardhjen e pasurisë së zyrtarëve të lartë publikë, rregullon kontrollin publik të pasurisë, të hyrat dhe përfitimet e tjera materiale, detyrimet financiare nga zyrtarët publikë, familjarët e tyre dhe personat e lidhur me ta, duke përfshirë sanksionet e përcaktuara me këtë ligj.