Nga një tërmet i fuqishëm, i cili goditi të mërkurën pjesën veriperëndimore të Kinës, humbën jetën të paktën 400 persona, si dhe u plagosen 8,000 të tjerë, njoftuan mediat shtetërore kineze.
Tërmeti që ndodhi në orën 7:49 të mëngjesit në provincën Qinghai, kishte fuqinë prej 6.9 ballësh sipas shkallës Rihter.
Sipas Qendrës së Tërmeteve në Kinë, tërmeti goditi qarkun Yushu, një zonë kjo e largët malore dhe pak e populluar kryesisht nga tibetianë.
Radioja Kombëtare e Kinës njoftoi se 80 për qind e shtëpive në zonën e goditur janë shkatërruar.
Përpjekjet për shpëtim po pengohen nga mungesa e lidhjeve telefonike, të cilat janë dëmtuar rëndë si pasojë e tërmetit.