Ndërlidhjet

Partitë serbe zhvillojnë fushatë


Fotografi ilustruese

Fotografi ilustruese

Partitë serbe në veri po zhvillojnë fushatën për zgjedhjet lokale serbe, të cilat për institucionet e Kosovës janë të paligjshme. Pothuaj secili subjekt serb në fushatë ka prioritet luftën kundër strategjisë së Qeverisë së Kosovës për veriun.


Subjektet politike në veri të Mitrovicës kanë intensifikuar fushatën për zgjedhjet lokale të 30 majit për këtë komunë, që organizohen nga Qeveria e Serbisë, e të cilat cilësohen të paligjshme nga institucionet e Kosovës.

Serbët shprehen të gatshëm për të marrë pjesë në këto zgjedhje, ndërsa përjashtojnë pjesëmarrjen në zgjedhjet e parapara me strategjinë e Qeverisë së Kosovës për integrimin e veriut në sistemin kosovar.

Kreu i Këshillit Nacional Serb për veriun e Mitrovicës, Millan Ivanoviq, thotë se serbët i pranojnë vetëm zgjedhjet e organizuara nga Qeveria e Serbisë.

“Sigurt mund të them se serbët në Mitrovicë, në veri të Mitrovicës, nuk do të marrin pjesë në zgjedhjet që i organizojnë institucionet e Kosovës, sipas Planit të Ahtisarit. Serbët nuk i pranojnë këto institucione, ata i kanë institucionet e veta, shtetin e vet, dhe do të marrin pjesë në zgjedhjet lokale që i organizon Republika e Serbisë”, thotë Ivanoviq.

Iniciativa Qytetare Serbia, Demokracia dhe Drejtësia, të cilën e udhëheq sekretari shtetëror në Ministrinë për Kosovën në Qeverinë e Serbisë, Oliver Ivanoviq, është subjekt i ri politik që garon në zgjedhjet lokale në Mitrovicë.

Ivanoviq thotë se si kryetar komune, ai do të përforcojë praninë e institucioneve serbe në terren, por edhe do t’ia kthejë namin qytetit.

“Ky qytet kurrë nuk është dukur më keq, sesa tash. Unë kujtoj kohëra më të mira. E dyta, ka shumë çështje të pazgjidhura, duke u nisur nga ujësjellësi. Tash e 10 vjet nuk ka furnizim të rregullt. Qyteti është i ngulfatur. S’ka ngrohje”.

“Për këto dhe shumë çështje tjera, kam vendosur të garoj. Mendoj se jemi i vetmi subjekt që do t’i mbajë premtimet, sepse unë do të vë kontakte me këdo që duhet, me zyrtarët e BE-së, me Beogradin, dhe kjo duhet të jetë forma, ky duhet të jetë kapaciteti që duhet ta ketë kryetari i ri i qytetit”, thekson Ivanoviq.

Pothuaj të gjitha subjektet politike në fjalorin e tyre gjatë kësaj fushate parazgjedhore, kanë luftën që do të bëjnë kundër zbatimit të strategjisë për integrimin e veriut, strategji kjo që synon kthimin e sundimit të ligjit në këtë pjesë të kontrolluar nga strukturat paralele serbe.

Një nga ta është edhe përfaqësuesi i Partisë Serbe të Progresit, Kërstimir Pantiq.

“Qytetarët e Mitrovicës, kanë treguar unitet kur është fjala për interesin kombëtar, ndërsa sot interesi më i madh kombëtar është ruajtja e Kosovës në përbërjen e Serbisë, dalja në zgjedhje më 30 maj dhe respektimi i ligjeve dhe institucioneve të Serbisë. Duhet bojkotuar Plani i Marti Ahtisarit, sikurse edhe ai i strategjisë për veriun”, shprehet Pantiq.

Në mesin e qytetarëve ka mendime të ndryshme në lidhje me pjesëmarrjen në zgjedhjet e 30 majit, të cilat institucionet e Kosovës i quajnë të paligjshme, por nuk duket se do të ndërmarrin ndonjë hap për t’i penguar ato.

“Unë i pranoj vetëm zgjedhjet që i organizon shteti serb, vetëm shiko se si jetoj, në frikë, edhe më tej nuk ka liri lëvizjeje, nuk kam kurrfarë besimi në institucionet e Kosovës”, thotë Zoran Nikoliq.

“Nuk do të dal në zgjedhjet lokale për Mitrovicën më 30 maj, sepse nuk i përkas asnjë subjekti politik. Programet politike më nuk po zbatohen. Do të ishte mirë që programet të realizohen në praktikë, por qytetarët më askujt nuk i besojnë dhe unë mendoj se asgjë nuk do të ndryshojë në qytetin tonë”, shprehet Bojana Angjelkoviq.

Serbët e veriut i kanë bojkotuar zgjedhjet e fundit lokale të organizuara nga institucionet e Kosovës, më 15 nëntor. Bojkotimi i zgjedhjeve kosovare bëhet pothuaj vazhdimisht në këtë pjesë, në të cilën ka përqendrim më të madh të strukturave paralele të financuara nga Qeveria e Serbisë.

Zgjedhjet e fundit që Qeveria e Serbisë i ka mbajtur në veri të Mitrovicës, kanë qenë ato të 11 majit të vitit 2008, vetëm 3 muaj pas shpalljes së pavarësisë së Kosovës.
XS
SM
MD
LG