Ndërlidhjet

logo-print

Zgjedhjet lokale serbe të 30 majit nuk nxorën ndonjë parti politike me vota të mjaftueshme për të formuar të ashtuquajturin pushtet lokal në Mitrovicë. Liderët e partive politike serbe thonë se presin kalkulimet për koalicione të mundshme për, siç e quajnë ata, pushtet.


Partitë politike serbe, të cilat garuan në zgjedhjet lokale në veriun e Mitrovicës, më 30 maj, të organizuara nga Beogradi, ende janë duke kalkuluar koalicionet e mundshme për konstituimin e, siç e quajnë ata, pushtetit lokal.

Kalkulimet e tilla bëhen për shkak se asnjëra nga partitë që garuan, nuk kanë fituar votat e mjaftueshme për të formuar të ashtuquajturin pushtet lokal.

Krstimir Pantiq, lider i Partisë Përparimtare Serbe, parti kjo me më së shumti vota, thotë se subjekti që përfaqëson ai kërkon koalicion të gjerë të partive, siç i quan ai, të mëdha.

“Partia Përparimtare Serbe mendon se është i nevojshëm formimi i një koalicion të gjerë të partive të mëdha, i cili në periudhën e ardhshme katërvjeçare me sukses do ta udhëhiqte Mitrovicën”.

“Një gjë e tillë është e nevojshme sidomos për shkak se na pret një periudhë shumë e vështirë dhe me plot sprova, të cilat duhet tejkaluar”,
thotë Pantiq, duke aluduar në zgjedhjet lokale, të cilat i kanë paralajmëruar institucionet e Kosovës për veriun e Mitrovicës.

Ndryshe, Marko Jakshiq, nga Partia Demokratike e Serbisë, e cila për nga numri i votave të fituara është partia e dytë, thotë se nuk pret që partia e tij do të mund të hyjë në ndonjë koalicion për pushtet.

“Opsioni i vetëm politik, për të cilin ne mendojmë se mundemi bashkërisht të formojmë qeverinë komunale, është Partia Përparimtare Serbe, si partner i koalicionit. Fatkeqësisht ajo që ka ndodhur është se të dy subjektet tona politike nuk e kemi shumicën e mjaftueshme për ta formuar pushtetin lokal”.

“Kështu që, unë nuk mendoj që ne do ta ndryshojmë programin tonë politik për shkak të disa ulëseve në Kuvendin Komunal”
, thekson Jakshiq.

Por, Oliver Ivanoviq, bartës i listës së ashtuquajtur “Liri, demokraci dhe drejtësi”, thotë se pret që partitë e njëjta, që janë në pushtet në Serbi, do ta bëjnë koalicionin për pushtet lokal edhe në Mitrovicë.

“Nuk duhet pritur se mund të ndodhë ndonjë mrekulli. Unë mendoj se raporti i forcave dhe koalicioni, i cili ekziston në nivelin e Republikës së Serbisë, do të jetë i pasqyruar edhe në nivelin e komunës”.

“Ndërkaq, mendoj se për postin e kryetarit të komunës nuk do të vendoset në nivelin lokal”
, shprehet Ivanoviq, duke shtuar se për këtë do të vendoset në nivelin qendror të Serbisë.

Në anën tjetër, Institucionet e Republikës së Kosovës dhe misioni evropian për sundimin e ligjit, EULEX, kanë thënë se zgjedhjet e 30 majit dhe rezultatet e tyre nuk do të jenë legale.

Por, liderët serbë thonë se deklaratat e tilla për ta janë të parëndësishme. Pantiq nga Partia përparimtare serbe thekson:

“Ne në Kosovë i respektojmë vetëm ligjet dhe institucionet e Republikës së Serbisë. Institucionet që kanë dalë në bazë të Planit të Ahtisaarit, ne nuk i pranojmë”.


Ngjashëm pohon edhe Oliver Ivanoviq.

“Është krejtësisht e parëndësishme ajo që përfaqësuesit e bashkësisë ndërkombëtare po e përsërisin, kinse nuk do të na njohin, sepse ata nuk do të kenë bashkëbisedues tjetër”.

“Është e rëndësishme që populli ta ketë të zgjedhurit e vet, ndërkaq bashkësia ndërkombëtare deshi s’deshi, do t’i duhet të bisedojë me ata që populli i pranon”
, përfundon Ivanoviq.
  • 16x9 Image

    Bekim Bislimi

    Bekim Bislimi ka lindur më 20. 03. 1968 në Vërban të Vitisë. Prej muajit dhjetor të vitit 2001 e deri më tash punon si korrespondent i Radios Evropa e Lirë, për shërbimin në gjuhën shqipe.

XS
SM
MD
LG