Misioni i Bashkimit Evropian për sundim të ligjit, EULEX, konfirmoi se ka një plan veprimi për luftimin e krimit të organizuar dhe korrupsionit. Kryeprokurori i EULEX-it, Johanes Van Vrejsvijk tha se EULEX-i posedon një listë të gjatë me emra të personave të dyshuar për korrupsion e krim të organizuar.
Këto komente, kryeprokurori i EULEX-it, i bëri gjatë një konference në Çagllavicë, ku bashkë me zyrtarë të Qeverisë dhe Prokurorisë së Kosovës prezantuan sfidat dhe rezultatet e arritura në fushën e sundimit të ligjit në çështjet që lidhen me raportin e progresit të Komisionit Evropian.
“Këtë mëngjes kam finalizuar planin operacional, të cilin do t’ia dërgoj edhe kolegut tim, kryeprokurorit kosovar Ismet Kabashi, pasi që kemi një sistem dualist vendor dhe ndërkombëtar”, tha Vrejsvijk.
Ky plan i veprimit përfshin në vete edhe listën e emrave që janë nën hetime, si dhe masat që parashihet të ndërmerren.
“EULEX-i e ka listën dhe ne do ta zbatojmë këtë listë në afatin kohor nga korriku i këtij viti deri në shtatorin e vitit të ardhshëm”, theksoi kryeprokurori i EULEX-it.
Kjo listë ku ka persona që janë nën hetime, sipas tij, është shumë e gjatë, por ai s’pranoi të flasë për numrin e saktë dhe nivelin apo pozitat e zyrtarëve që po hetohen.
“Është një listë e gjatë, aty përfshihen hetimet në gjithë Kosovën, përfshirë edhe Mitrovicën. Një pjesë ka të bëjë me Qeverinë, një tjetër me bizneset e tjera”, tha Vrejsvijk.
Ai e përjashtoi mundësinë që hetimet të godasin vetëm një parti politike, duke thënë se nuk ka parë ende ndonjë parti politike që nuk ka persona nën hetime.
Që nga zhvillimet e muajve të fundit që pasuan bastisjet në Qeveri dhe hetimet ndaj ministrit të Transportit, Fatmir Limaj, kryeprokurori i EULEX-it tha se kishte edhe tendenca për presione politike.
“Kishim disa incidente - ndërhyrje nga kryetari i Kuvendit”, tha Vrejsvijk, i cili në formë shakaje tha më pas se pas deklaratave të tij, presidenti Fatmir Sejdiu ndoshta është dashur ta emërojë Jakup Krasniqin prokuror.
Sidoqoftë, ai tha se natyra e punës së tij është e atillë që ka presione, por u zotua se nuk do t’u nënshtrohet atyre.
Çështjet primare që parashtrohen para të gjitha lëndëve që merren me sundimin e ligjit në Kosovë janë lufta kundër korrupsionit, krimit të organizuar e shpëlarjes së parasë...
Zotimin e tij për luftimin e korrupsionit dhe krimit të organizuar e dha edhe kryeprokurori i Kosovës, Ismet Kabashi, edhe pse në disa raste ai tha se Prokuroria e Kosovës ende është në formim e sipër.
“Çështjet primare që parashtrohen para të gjitha lëndëve që merren me sundimin e ligjit në Kosovë janë lufta kundër korrupsionit, krimit të organizuar, shpëlarjes së parasë dhe ekonomisë së ashtuquajtur ilegale apo të hirtë”, u shpreh Kabashi.
Në emër të Qeverisë së Kosovës, ministri i Drejtësisë, Haki Demolli, u dha mbështetje organeve të ndjekjes penale për veprimet e tyre në luftimin e dukurive negative.
“Qeveria e Kosovës u ka dhënë përkrahjen e plotë organeve të ndjekjes penale për ndëshkimin e të gjitha formave të krimit të organizuar, përfshirë edhe krimet e luftës dhe format e korrupsionit dhe formave tjera të krimit të organizuar”, theksoi Demolli.
Derisa në raportin e progresit është veçuar si sfidë mungesa e luftimit të dukurive negative, të dy kryeprokurorët, Vrejsvijk dhe Kabashi u zotuan se edhe në këtë fushë do të ketë rezultate konkrete.
