Brigada e fundit e trupave luftarake amerikane është tërhequr sot nga Iraku, afro shtatë vjet e gjysmë pas ndërhyrjes së Shteteve të Bashkuara.
Televizionet amerikane kanë shfaqur pamjet e largimit të Brigadës së IV drejt Kuvajtit.
Pentagoni nga ana tjetër nuk i ka konfirmuar informacionet që paraqesin një largim më të shpejtë se ç’ishte planifikuar të trupave luftarake nga Iraku.
Departamenti i Mbrojtjes ka theksuar se zyrtarisht “Operacioni liria e Irakut” mbyllet në fund të muajit.
Nga ana tjetër, zëdhënësi i Departamentit të Shtetit, Filip Kroullei, tha se ky nuk është fundi i përfshirjes amerikane në Irak, që tashmë do të jetë më shumë civile, e më pak ushtarake.
