Ndërlidhjet

logo-print

Në dekadën e fundit, vetëm brenda një viti shkatërrohen rreth 500 hektarë tokë bujqësore, të cilat janë shndërruar në tokë ndërtimore, thonë zyrtarë qeveritarë dhe ekspertë të bujqësisë.

Procesi i shkatërrimit dhe dëmtimit të tokës bujqësor, sipas tyre, paraqet problem shqetësues për sigurimin e ushqimit në të ardhmen.

Ilaz Gashi, shef i divizionit për tokë bujqësore në Ministrinë e Bujqësisë, Pylltarisë dhe Zhvillimit Rural, thotë se sipërfaqja e tokës së punuar është mjaft e ulët - llogaritet të jetë rreth 0.15 hektar për kokë banori, ndërkaq sipas standardeve ndërkombëtare, minimumi ekzistencial për prodhimin e ushqimit të mjaftueshëm, është 0.17 hektarë për kokë banori.
Jemi nën minimumin ekzistencial, çka paraqet vështirësi për të ardhmen, e sidomos për gjeneratat që do të vijnë pas nesh.


“Jemi nën minimumin ekzistencial, çka paraqet vështirësi për të ardhmen, e sidomos për gjeneratat që do të vijnë pas nesh”,
thotë Gashi.

Një sipërfaqe e madhe e tokës bujqësore, shton Gashi, është shndërruar në tokë urbane në mënyrë të paplanifikuar, për zgjerimin e zonave urbane, ndërsa në pjesën tjetër janë ndërtuar objekte për veprimtari ekonomike dhe banimi.

E gjithë kjo, sipas Gashit, ka ndodhur për shkak të lëvizjeve të popullatës nga zonat rurale në ato urbane.

Toka, e cila vlerësohet se është dëmtuar, apo i është ndërruar destinimi prej tokës bujqësore për qëllime tjera, kryesisht është për veprimtari ekonomike, veprimtari tregtare, shërbyese, për pompa të benzinës, për ndërtime individuale e kolektive”.

“Dhe, ajo çka është më e keqja, këto janë buzë rrugës magjistrale dhe rajonale, të cilat kanë një kualitet të lartë të tokës, që paraqet një disavantazh për zhvillimin e sektorit të bujqësisë”
, shprehet Gashi.

Kosova ka një sipërfaqe të përgjithshme prej 10 mijë e 887 kilometra katror.

Ndërsa, sipas disa statistikave të Ministrisë së Bujqësisë, 200 mijë familje ose rreth një milion banorë tani janë duke jetuar në shtëpi të reja në tokat bujqësore të ndërtuara pas vitit 1999.

Shkatërrimi i tokës bujqësore, apo ndryshimi i destinimit të saj, ka ndikuar që Kosova të varet nga importi i produkteve të grurit, dhe në këtë mënyrë, lëvizjet e çmimeve të produkteve të konsumit në botë, po ndikojnë edhe në vendin tonë, thonë ekspertë të bujqësisë

Skënder Kaçiu, profesor në Fakultetin e Bujqësisë në Universitetin e Prishtinës, thekson nevojën urgjente që toka bujqësore të mbrohet nga degradimi.
Është nevojë urgjente që toka bujqësore të mbrohet.


“Si rezultat i mungesës së mbrojtjes institucionale të tokës bujqësore, ajo i është nënshtruar një sundimi shumë të madh për nevoja të tjera. Dhe, kjo ka bërë që sipërfaqet me tokë bujqësore të zvogëlohen në vazhdimësi. Është nevojë urgjente që toka bujqësore të mbrohet”
, vlerëson Kaçiu.

Ndryshe, në Kosovë ekzistojnë mekanizma ligjorë që parandalojnë shkatërrimin e tokës.

Idriz Gashi, thotë se ekziston Ligji për tokë bujqësore, por përgjegjës për zbatimin e këtij ligji janë kuvendet komunale, ndërsa Ministria e Bujqësisë e bën monitorimin e zbatimit të tij.
  • 16x9 Image

    Nadie Ahmeti

    Me profesionin e gazetarisë ka filluar të merret që prej vitit 2000, kurse Radios Evropa e Lirë i është bashkuar në vitin 2001. Kryesisht mbulon çështjet ekonomike dhe sociale, për çka edhe i janë ndarë disa mirënjohje.

Trego komentet

XS
SM
MD
LG