Dhjetëra mijëra vetë u tubuan të shtunën para Memorialit të Linkolnit në Uashington.
Tubimi u organizua nga gazetari i televizionit konservator “FOX”, Glen Bek, i cili i ftoi shikuesit në kryeqytetin amerikan që të “rivendosin nderin e Amerikës”.
Në mesin e folësve ishte kandidatja për nënpresident në zgjedhjet 2008, Sara Palin.
“Ne nuk duhet ta transformojmë krejtësisht Amerikën siç duan disa. Ne duhet ta rivendosim nderin e saj”, tha Palin.
Tubimi u kritikua nga disa udhëheqës të lëvizjes civile, për shkak se u mbajt në të njëjtën ditë dhe të njëjtin vend ku 47 vjet më parë Martin Luter King e mbajti fjalimin e tij “Unë kam një ëndërr”.