Ndërlidhjet

Njohësit e çështjeve juridike dhe ish-drejtues të Komisionit Qendror të Zgjedhjeve thonë se me Ligjin për zgjedhjet, asnjë iniciativë qytetare nuk mund të regjistrohet në KQZ në kuadër të një partie politike.

Një ditë më parë, Bujar Bukoshi bashkë me Ukë Rugovën, të birin e presidentit të ndjerë, Ibrahim Rugova, kanë publikuar listën LDK-Ibrahim Rugova, për të cilën kanë thënë se do të garojë si iniciativë qytetare në kuadër të Lidhjes Demokratike të Kosovës.

Por, ish-kryetari i KQZ-së, Mazllum Baraliu, aktualisht profesor në Fakultetin Juridik, thotë se partitë politike, koalicionet, iniciativat qytetare dhe kandidatët e pavarur, ligji i konsideron si subjekte politike.

“Iniciativa qytetare nuk është më në kuadër të partisë politike, me vetë faktin se dëshiron të regjistrohet dhe certifikohet. Ajo shkon si subjekt politik i pavarur dhe vetëm si e tillë mund të regjistrohet. Brenda një partie nuk mund të regjistrohet si shoqatë ose iniciativë qytetare”, thotë Baraliu për Radion Evropa e Lirë.
Me këtë iniciativë qytetare që quhet Lista Ibrahim Rugova, mund të regjistrohemi...

Bujar Bukoshi, anëtar i LDK-së, mendon se alternativa e LDK-së, "LDK - Ibrahim Rugova”, do të mund të garojë në kuadër të partisë. Ai thotë se një gjë e tillë lejohet dhe mund të bëhet me Ligjin e zgjedhjeve.

“Me këtë iniciativë qytetare që quhet Lista Ibrahim Rugova, mund të regjistrohemi”, shprehet Bukoshi.

Në nenin 19 të Ligjit për zgjedhjet e përgjithshme në Kosovë thuhet se Komisioni Qendror i Zgjedhjeve e trajton nismën qytetare si subjekt politik nga dita e regjistrimit të saj, derisa nisma qytetare të dorëzojë raportin përfundimtar të publikimit financiar të fushatës.

Nga ana tjetër, sekretari i përgjithshëm i LDK-së, Ramë Manaj, thotë për Radion Evropa e Lirë se në kuadër të një partie politike nuk mund të funksionojë një iniciativë qytetare.

Sipas tij, një çështje të tillë e sqaron shumë mirë Ligji për zgjedhjet.
Në kuptim të ligjit dhe dokumenteve partiake nuk mund të ketë iniciativë qytetare brenda një partie politike...

“Në kuptim të ligjit dhe dokumenteve partiake nuk mund të ketë iniciativë qytetare brenda një partie politike - është një ‘nonsens’ i llojit të vet. Iniciativa qytetare brenda LDK-së nuk mund të ketë, as brenda PDK-së ose çfarëdo subjekti tjetër politik”, thekson Manaj.

Sipas tij, Lidhja Demokratike e Kosovës nuk mund të hyjë në garën zgjedhore me dy lista zgjedhore. Siç thotë Manaj, nëse Bujar Bukoshi dhe të tjerët duan të jenë fraksion i LDK-së, ajo do të jetë e pamundur.

“Nuk ka LDK të Bukoshit e as të Sejdiut, ka një LDK. LDK-ja është një dhe unike. Në të mund të hyjë kush të dojë dhe të dalë kush të dojë kur të dojë. Natyrisht, ai që nuk e gjen veten, del. Por, nuk mund të ketë fraksion legal brenda LDK-së dhe nuk mund të ketë fraksione, sepse është një subjekt”.

“Ata le të thonë se mund ta ndjejnë veten si fraksion, porse formojnë një subjekt tjetër juridik”,
thotë Manaj.

Bukoshi, deklaratat e anëtarëve të kryesisë i cilëson si të gabuara.

“Anëtaret e kryesisë, shumë gjëra mohuan, por nuk po iu del ashtu, sepse e kanë gabim. Në këtë vend të lirë mund të formoni iniciativë qytetare dhe të dilni para elektoratit. Ato vota do të jenë të LDK-së, janë vota për LDK-në, por jo për këtë LDK që është bunkerizuar...”, thotë Bukoshi.

Bukoshi edhe sot ftoi të gjithë ata persona, të cilët janë larguar nga LDK-ja, që t’i bashkohen iniciativës së tij për, siç tha, kthimin e identitetit të LDK-së.

Lexoni edhe këtë: Beteja në LDK
  • 16x9 Image

    Arton Konushevci

    Arton Konushevci merret me gazetari që nga viti 2001. Në vitin 2007 ka filluar të punojë si korrespondent i Radios Evropa e Lirë. Jeton në Prishtinë, është i martuar dhe ka dy fëmijë.

Trego komentet

XS
SM
MD
LG