Një ditë para mbajtjes së Kuvendit të VII zgjedhor të Lidhjes Demokratike të Kosovës, ende nuk dihet saktë se kush do të jetë kandidat për të parin e kësaj partie.
Mediat e shkruara në Prishtinë, thonë se anëtari i kësaj partie, Isa Mustafa, i cili aktualisht është kryetar i Komunës së Prishtinës, është kandidaturë konsensuale e Kryesisë së LDK-së, duke thënë po ashtu se kryetari aktual, Fatmir Sejdiu, nuk do të garojë për kryetar të partisë.
Por, sekretari i përgjithshëm i LDK-së, Ramë Manaj, hedh poshtë deklaratat e tilla, duke konfirmuar se ato nuk janë të vërteta.
Manaj konfirmon se kryetari i LDK-së, Fatmir Sejdiu, ka hequr dorë që të jetë bartës i listës që të konkurrojë për deputet të Kuvendit, e jo për të parin e LDK-së.
Kryetari Sejdiu ka hequr dorë që të jetë bartës i listës, nuk do të konkurrojë për deputet në Parlamentin e Kosovës.
“Nuk ka informatë që ka hequr dorë, së paku deri sot jo, nuk e di çka do të ndodhë, por nuk e besoj që do të heqë dorë. Kryetari Sejdiu ka hequr dorë që të jetë bartës i listës, nuk do të konkurrojë për deputet në Parlamentin e Kosovës. Kjo është thënë dhe kështu e ka thënë vetë kryetari në takim me kryetarët e degëve”, deklaron Manaj.
Nga ana tjetër, analistët politikë këtë çështje e konsiderojnë si një proces normal, nëse kryetari i një partie politike nuk i prin listës së saj zgjedhore.
Analisti Halil Matoshi shpjegon:
“Është shumë normale, ka shumë parti, të cilat objektivisht, kryetari ose lideri i saj nuk i prin listës, por e vendosin kandidatin që për momentin paraqet më shumë fuqi politike, më shumë autoritet dhe kredibiletet, koherencë e tjera”.
“Kështu që nuk është e thënë që gjithmonë kreu i një partie t’i prijë edhe listës në zgjedhje. Kjo është në suaza të normaliteti demokratik”.
Matoshi thekson se pas zhvillimeve të fundit brenda LDK-së, dhe me formimin e Listës Ibrahim Rugova, duket se kryesia e partisë ka kuptuar se ndryshimet në udhëheqjen LDK-së janë të nevojshme.
“Përfundimisht duket se edhe kryesia aktuale e LDK-së e ka kuptuar momentumin psikologjik se me Fatmir Sejdiun në krye të kësaj partie realisht, jo që s’mund të jetë LDK-ja një konkurrente e denjë e PDK-së, por madje ekziston rreziku i shpërbërjes së saj”.
“Po qe se nesër ndodh kthesa dhe zoti Mustafa e merr timonin e LDK-së, unë besoj se po krijohet një bllok i rezistencës ndaj PDK-së dhe gjasa të mira që ta marrë pushtetin”, vlerëson Matoshi.
Kryesia e Lidhjes Demokratike të Kosovës ka përcaktuar agjendën e punës së Kuvendit Zgjedhor.
Lista Ibrahim Rugova, e dalë po nga LDK-ja, ka aplikuar për regjistrim në Komisionin Qendror të Zgjedhjeve.
Astrit Haraqija, anëtar i Kryesisë së LDK-së dhe njëri ndër udhëheqësit e Listës “LDK – Ibrahim Rugova”, së bashku me Ukë Rugovën dhe Bujar Bukoshin, thotë se udhëheqja që del nga Kuvendi zgjedhor i 7 nëntorit, do të jetë e paligjshme.
Ata pohojnë se pas zgjedhjeve parlamentare të 12 dhjetorit, LDK-ja duhet të mbajë një kuvend të vërtetë të brendshëm zgjedhor.
