Aleanca për Ardhmërinë e Kosovës dhe “Lista Ibrahim Rugova” formalizuan marrëveshjen e koalicionit.
Nënkryetari i parë i AAK-së, Blerim Shala, dhe kryesuesi i “Listës Ibrahim Rugova”, Ukë Rugova thanë se marrëveshja paraqet një vazhdimësi të partneritetit të lidhur në dhjetorin e vitit 2004 ndërmjet presidentit të ndjerë, Ibrahim Rugova dhe kryetarit të AAK-së, Ramush Haradinaj.
Për t’i dhënë pamjen e vazhdimësisë së këtij partneriteti, edhe marrëveshja u nënshkruan në rezidencën e presidentit të ndjerë Rugova.
Kryesuesi i “Listës Rugova”, Ukë Rugova, tha se kjo listë nuk ka dalë (kaluar) nga Lidhja Demokratike e Kosovës, por asaj nuk i është dhënë hapësirë nga kryetari i LDK-së, Isa Mustafa, andaj ka vendosur që në zgjedhje të përfshihet në listë me AAK-në.
Ne jemi ‘Lista Dr.Ibrahim Rugova’ dhe siç kemi thënë edhe më herët, jemi pjesë e LDK-së.
“Ne nuk jemi duke përfunduar në AAK. Ne jemi ‘Lista Dr.Ibrahim Rugova’ dhe siç kemi thënë edhe më herët, jemi pjesë e LDK-së. Por, fatkeqësisht kanë qenë të gjitha dyert e mbyllura që të kemi mundësi të prosperojmë brenda LDK-së”.
“Andaj, kuptohet që politikisht janë disa momente kur njeriu duhet të gjejë zgjidhje dhe duke pasur parasysh marrëveshjen e mëhershme që presidenti Rugova e pati nënshkruar me kryeministrin Haradinaj, e kemi parë të rrugës që sërish të afrohemi me këtë subjekt, me të cilin kemi shumë ngjashmëri edhe programore”, tha Ukë Rugova.
Pasi që afati i koalicioneve ka përfunduar, “Lista Rugova” parashihet të përfshihet në kuadër të listës zgjedhore të AAK-së.
Blerim Shala tha se bartësit e kësaj liste zgjedhore do të jenë Ramush Haradinaj dhe Ukë Rugova. Shala u shpreh i bindur se ky koalicion paraqet një peshë të re politike në Kosovë.
“Ne do të synojmë që përmes këtij koalicioni parazgjedhor që po lidhim sot me ‘Listën Dr.Ibrahim Rugova’ t’i fitojmë zgjedhjet e 12 dhjetorit dhe të krijojmë qeverinë e përbashkët, së bashku edhe me partnerët e tjerë që na janë bashkangjitur në listën e përbashkët”, u shpreh Shala.
Para se “Lista Rugova” të lidhte koalicion me AAK-në, u zhvillua edhe një takim ndërmjet kryetarit të LDK-së, Isa Mustafës dhe Ukë Rugovës.
Mirëpo, oferta e Mustafës që vetëm Ukë Rugova të përfshihet në listën e LDK-së, nga Ukë Rugova dhe familja e presidentit të ndjerë u refuzua dhe u cilësua si poshtëruese.
Madje, familja Rugova reagoi dhe përmes një komunikate e ka cilësuar politikën e Isa Mustafës dhe Kryesisë së re të LDK-së në kundërshtim me politikën rugoviane.
Më pas, edhe Kryesia e LDK-së reagoi duke shprehur keqardhje për qëndrimet e familjes Rugova dhe i përsëriti Ukë Rugovës ftesën dhe ofertën që të përfshihet në listën e saj zgjedhore.
Sidoqoftë, Rugova tha se tash për tash ai do të vazhdojë me AAK-në, por duke e ruajtur anëtarësinë e listës që drejton si pjesë të Lidhjes Demokratike të Kosovës.
