Ndërlidhjet

“Kosova e re” në vitin 2016?!


Foto ilustruese
Foto ilustruese
Termocentrali “Kosova e re” pritet të përfundojë deri në 2016-ën, ndërsa vitin e ardhshëm do të përzgjidhet kompania fituese për realizimin e këtij projekti, thotë ministrja në dorëheqje e Energjisë dhe Minierave, Justina Shiroka-Pula.

Katër konsorciume ndërkombëtare, nga gjashtë sa kishin aplikuar për këtë projekt, i kanë përmbushur kriteret për ndërtimin e termocentralit.

Shiroka-Pula thotë se realizimi i këtij projekti duhet të jetë prioritet në agjendën e qeverisë së re të Kosovës.

“Edhe me strategji është paraparë që në vitin 2015-2016 të startojmë me Termocentralin 'Kosova e re'. Kur është ndërtuar kjo strategji, është menduar rreth 5 ose 6 vjet... Do të thotë, nuk jemi shumë larg objektivave dhe planeve që i kemi paraparë në kuadër të strategjisë”, thotë Shiroka-Pula.

Projekti “Kosova e re” është shtyrë vit pas viti. Për këtë, Ethem Çeku, ministër i Energjisë në kohën kur është punuar projekti, shprehet skeptik se termocentrali mund të përfundojë deri në vitin 2016.

Ai madje thotë se nuk është e qartë nëse janë ende në garë kompanitë kualifikuese.

“Unë jam skeptik shumë i madh... Në qoftë se llogarisim se ende nuk është bërë pakoja tenderuese, e pas saj ka disa muaj apo vit që merr negocimi për marrëveshje, shohim se këta janë në pikën zero të projektit ‘Kosova e re’”, thotë Çeku.

Kosova A
Sipas tij, zvarritja e finalizimit të Termocentralit “Kosova e re”, rrezikon vendin të përballet me mungesë të madhe të energjisë elektrike në vitet e ardhshme, e rrjedhimisht edhe me probleme të tjera.

Kosova do të hyjë në krizë të madhe zhvillimore, në shpenzime të mëdha buxhetore, do të na ikin investitorët e jashtëm... Edhe për shumë vite, ne do të mbesim vendi më i varfër në Evropë, për shkak të mungesës së madhe të energjisë elektrike”.

“Logjikisht, na bën të kuptojmë se buxheti i Kosovës do të derdhet në masë të madhe në drejtim të kompanive të rajonit, për të blerë energji elektrike“,
thotë Çeku.

Por, Justina Shiroka-Pula, mungesën e energjisë elektrike nuk e lidh me Termocentralin “Kosova e Re”. Sipas saj, reduktimet e energjisë janë pasojë e mospagesës së faturave të shpenzuara të rrymës.

“Në qoftë se i krahasojmë vendet në Ballkan, shohim se Kosova afër 87 për qind të energjisë i mbulon me prodhim të vetin; vetëm 12, eventualisht 13 për qind importon gjatë dimrit. Vendet në Ballkan importojnë deri në 30 për qind e më shumë, si: Mali i Zi, Maqedonia dhe Shqipëria”.

“Pra, nëse e shohim këtë raport, se konsumi i energjisë mbulohet në sasinë më të madhe me prodhimin vendor, do të thotë se ne nuk qëndrojmë keq sa u përket nevojave dhe prodhimit të energjisë
”, thekson Shiroka-Pula.

Termocentrali “Kosova e re” llogaritet të jetë një ndër projektet më të mëdha në vend. Përgatitjet rreth tij kanë filluar qysh në vitin 2005, kur edhe është miratuar Strategjia për Zhvillimin e Energjisë, me të cilën është vendosur të nisë ndërtimi i një termocentrali, të quajtur në atë kohë “Kosova C”.

Lexoni edhe këtë:
Projekti “Kosova e Re”, i prolonguar
XS
SM
MD
LG