Raportet nga Irani thonë se për automobilin e presidentit iranian Mahmud Ahmadinexhad, i cili është nxjerrë në ankand për qëllime humanitare, është dhënë ofertë prej 1 milion dollarëve.
Agjencia gjysëm zyrtare e lajmeve IRNA citoi kreun e Organizatës Sociale të Mirëqenies, Ahmad Esfandiari, të ketë thënë se ofertuesi vjen nga një vend arab, dhe e dëshiron makinën e Ahmadinexhadit për koleksion privat.
Ahmadinexhad e ka nxjerrë në shitje automjetin "Peugeot" të vitit 1977, për të ndihmuar të rinjtë dhe personat me aftësi të kufizuar.
Analistët thonë se hapi është përpjekje e tij për të fituar simpatinë tek popullata e re.
Raportohet se ankandi do të mbahet kah mesi i shkurtit.