Dy luftanije amerikane kanë hyrë në Detin Mesdhe po lundrojnë drejt ujërave të Libisë, ndërkohë që lideri libian Muamer Gadafi thotë se "do të luftojë deri në njeriun e fundit".
Luftanijet USS Kearsarge dhe USS Ponce e kaluan sot Kanalin e Suezit pasi destrojeri USS Barry të hënën e kaloi kanalin e njëjtë.
Në Tripoli, Gadafi përsëri e akuzoi Al Kaidën për trazirat në vendin e tij, dhe tha se kurrë nuk do të tërhiqet.
Raportohet për 10 të vrarë në luftimet e kryengritësve dhe forcave të qeverisë në portin lindor Brega.
Po sot, kryetari i Komisionit Evropian, Zhoze Manuel Barroso tha se Gadafi duhet të largohet.
Në Hagë, Gjykata Penale Ndërkombëtare tha se nesër do të hapë hetime për dhunën në Libi.