Ndërlidhjet

Japoni: Reaktori i tretë – pa ftohje

  • RFE /RL

Pamje nga shpërthimi në Fukushima, të transmetuara nga televizioni...

Pamje nga shpërthimi në Fukushima, të transmetuara nga televizioni...


Japonia ka kërkuar ekspertë nga Agjencia Ndërkombëtare për Energji Bërthamore që t'i ndihmojnë t'ia dalë mbanë me dëmin e shkaktuar nga tërmeti në centralin Fukushima.

Jukija Amano, shefi i agjencisë me seli në Vjenë, ka thënë se agjencia dhe Qeveria në Tokio po diskutojnë dërgimin e ekspertëve në Japoni.

Udhëheqësit e centralit atomik për prodhimin e rrymës elektrike, që ishte dëmtuar nga tërmeti masiv i së premtes dhe cunami në Japoni, kanë thënë se sistemi i ftohjes i reaktorit të tretë ka dështuar.

Më herët, dy reaktorët e tjerë në centralin atomik në Fukushima, kanë pasur probleme të njëjta, që janë përcjellë me eksplodime.

Pas eksplodimit në mëngjesin e së hënës, zyrtarët kan njoftuar se 11 vetë janë plagosur, por kontejneri bërthamë i reaktorit numër 3 nuk ishte dëmtuar.

Sekretari i kabinentit japonez, Yukio Edano, ka thënë të hënën se është dhënë një urdhër për evakuim.

“Eksplodimi besohet se ishte i llojit të njëjtë me atë në reaktorin numër 1. Ne kemi urdhëruar evakuimin e njerëzve, që jetojnë në rreze prej 20 kilometrash nga centrali dhe ne u kemi thënë njerëzve, që ishin në procesin e evakuimit, që të hyjnë brenda menjëherë”, ka thënë Yukio Edano.

Reaktori numër 1 ishte goditur nga shpërthimi të shtunën.

Të dielën, zyrtarët në centralin Fukushima, që është 240 kilometra në verilindje të Tokios, kanë thënë se niveli i rrezatimit ishte rritur mbi nivelin e sigurisë, por kjo nuk ishte “kërcënim i menjëhershëm” për shëndetin njerëzor.

Aeroplan-bartësi i Shteteve të Bashkuara, që është i vendosur afro 160 kilometra në verilindje të Fukushimës, kishte lëvizur tutje, pas zbulimit të rrezatimit të nivelit të ulët.

Mediat japoneze kanë raportojnë se 2 mijë trupa të pajetë janë gjetur të hënën në brigjet e prefekturës Mijagji, që më së shumti është goditur nga cunami.

Ka shqetësime se nga tërmeti i së premtes në Japoni, kanë humbur jetën afro 10 mijë njerëz.

Kryeministri Naoto Kan, ka vlerësuar se kjo ishte kriza më e madhe në Japoni, pas Luftës së Dytë Botërore.

Banka e Japonisë sot e ka futur një shumë rekorde prej 180 miliardë dollarësh në sistemin bankar, për t’i zbutur brengat lidhur me gjendjen e ekonomisë së tretë më të madhe në botë, pas tërmetit. (f.b.)


XS
SM
MD
LG