Ndërlidhjet

KMDLNJ: Policia nuk e ka provokuar dhunën gjatë protestave


Këshilli për Mbrojtjen e të Drejtave e të Lirive të Njeriut ka vlerësuar se gjatë protestave të Lëvizjes Vetëvendosje, "policia e Kosovës nuk ka qenë palë që e ka provokuar dhunën dhe është treguar e përmbajtur".

Në një komunikatë për opinion, KMDLNJ gjithashtu vlerëson se policia e Kosovës, njëkohësisht, "nuk ka qenë e përgatitur për ta kontrolluar situatën dhe për të parandaluar përshkallëzimin e saj".

“KMDLNj përkujton se e drejta për të protestuar është e drejtë e ligjshme dhe demokratike. Mirëpo, një protestë ku rrezikohet jeta e njerëzve dhe prona e qytetarëve është e papranueshme sepse i tejkalon caqet e një proteste paqësore”, thuhet në komunikatë.

Protesta është organizuar në shenjë kundërshtimi me vizitën e kryenegociatorit të Serbisë, Borko Stefanoviq, në Kosovë, për të cilën kishin dhënë leje institucionet vendore.

Në adresë të institucioneve vendore, KMDLNj ka shtruar kërkesën që procesi i dialogut me Serbinë të jetë më transparent, sidomos nga ata të cilët janë pjesë e këtij dialogu.
XS
SM
MD
LG