Ndërlidhjet

Roqen: Ka kaluar koha e ndarjeve


Millan Roqen - foto arkiv

Millan Roqen - foto arkiv

Ministri i Jashtëm i Malit të Zi, Millan Roqen, ka qëndruar sot në Prishtinë, me ç’rast është pritur nga udhëheqësit më të lartë të institucioneve të Kosovës. Duke komentuar deklaratat e zyrtarëve serbë për ndarjen e Kosovës, Roqen tha se ka kaluar koha e ndarjeve dhe e rishkrimit të kufijve dhe se tani është koha e integrimit të rajonit në Bashkimin Evropian.



Koha e ndarjeve dhe e rishkrimit të kufijve në Ballkan ka përfunduar, deklaroi sot në Prishtinë ministri i Punëve të Jashtme dhe Integrimeve Evropiane të Malit të Zi, Millan Roqen.

Këto komente, ai i bëri gjatë një konference të përbashkët me ministrin e Punëve të Jashtme të Kosovës, Enver Hoxhaj.

Roqen tha se idetë e lansuara kohë pas kohe në Beograd për ndarje e shkëmbim territoresh, nuk përkojnë me kohën, ngase tani është koha e integrimeve dhe jo e ndarjeve.
Mendoj se ka kaluar përgjithmonë koha e projekteve për shtete të mëdha, të cilat kurrë nuk i kanë sjellë të mira askujt.

“Mendoj se ka kaluar koha e ndarjeve dhe e rishkrimit të kufijve të rinj në rajonin tonë. Për të gjithë ata që ëndërrojnë këso ëndrrash, pavarësisht se a janë në Serbi, Mal të Zi, Kosovë apo Shqipëri, mendoj se ka kaluar përgjithmonë koha e projekteve për shtete të mëdha në këtë rajon, të cilat kurrë nuk i kanë sjellë të mira askujt”, u shpreh Roqen.

Ai tha se Mali i Zi ka raporte të mira me Serbinë dhe se këto marrëdhënie nuk janë prishur për shkak të njohjes së Kosovës. Njëherësh, potencoi Roqen, Podgorica nuk është penduar në asnjë rast që e ka njohur shtetin e Kosovës.

Duke iu referuar vizitës së tij në Prishtinë, ai tha se Kosova dhe Mali i Zi kanë rikonfirmuar gatishmërinë për thellimin e marrëdhënieve bilaterale.

Ministrat e Jashtëm, Millan Roqen dhe Enver Hoxhaj, thanë se Kosova dhe Mali i Zi do të vendosin marrëdhënie në nivel ambasadash vitin e ardhshëm. Të dy ministrat u angazhuan edhe për marrëveshje ndërfqinjësore, për lirinë e lëvizjes, të qarkullimit të njerëzve dhe mallrave, si dhe për zbatimin e marrëveshjes për riatdhesimin.

Ministri Enver Hoxhaj tha se Kosova tashmë ka vendosur që komuniteti malazez në Kosovë të fitojë statusin e pakicës dhe se kjo pozitë e re, këtij komuniteti do t’i njihet me Kushtetutën e Kosovës, e cila aktualisht është në procesin e amendamentimit.

Republika e Kosovës është e përkushtuar që komunitetin malazez në Kosovë ta përcaktojë në Kushtetutën e ardhshme të Republikës së Kosovës. Biseduam për marrëveshje në fushën e riatdhesimit, biseduam për hapjen e një vendkalimi të ri kufitar në Çakor, pastaj për çështjen e lëvizjes së qytetarëve në të dyja vendet vetëm me letërnjoftim”, tha ministri Hoxhaj.

Ministri i Jashtëm malazez është pritur edhe nga presidentja Aifete Jahjaga dhe kryeministri Hashim Thaçi. Gjatë kësaj vizite është biseduar edhe për demarkacionin e kufirit me Malin e Zi, për të cilin është thënë se nuk paraqet ndonjë çështje problematike. Të dyja palët kanë shprehur besimin se kjo çështje do të zgjidhet shumë shpejt.
  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

XS
SM
MD
LG