Ndërlidhjet

KQZ shpall Lulzim Bashën fitues në Tiranë


Në Shqipëri, Komisioni Qendror i Zgjedhjeve, mbrëmë e ka miratuar projekt aktin, sipas të cilit fitues zyrtar i garës për kryetar të Bashkisë së Tiranës, është kandidati demokrat, Lulzim Basha.

Sipas KQZ-së, nga miratimi i tabelës përmbledhëse, Edi Rama (Partia Socialiste) ka marrë 124 947 vota, ndërsa Lulzim Basha 125 042 vota. Pra, dallimi në favor të Bashës është 95 vota.

Këtë mbledhje e shoqëruan debate të shumta, ndërsa projekt akti u miratua 4:2 në vota.

Përfaqësuesit e opozitës përsëritën pretendimet e tyre për parregullsi të shumta në proces duke theksuar në veçanti mospërputhjen e shifrave mes votuesve dhe fletëve të votimit, që rezultojnë më të shumta në numër.

Sipas demokratëve, Kolegji Zgjedhor e ka mbyllur këtë çështje, por socialistët pretendojnë të kundërtën dhe kanë njoftuar se do të kërkojnë pavlefshmërinë e procesit.

Pas këtij zhvillimi, në selinë e Partisë Demokratike në Tiranë, u paraqit Lulzim Basha.

Me një deklaratë, me ç’rast ai foli si kryetar i ardhshëm i Bashkisë së Tiranës, ai theksoi se pret mbylljen e të gjithë procesit për t’iu vënë punës për realizimin e premtimeve të bëra.
XS
SM
MD
LG