Ndërlidhjet

DASH shpreh keqardhje per moskoordinim

  • RFE /RL

Fotografi ilustruese

Fotografi ilustruese

Shtetet e Bashkuara kanë shprehur keqardhje se veprimet e mbrëmshme nga qeveria e Kosovës për të marë kontrollin në vendkalimet kufitare ne veri të Kosovës nuk ishin të koordinuara me komunitetin ndërkombëtar.

Në një deklaratë të Departamentit Amerikan të Shtetit, Shtetet e Bashkuara i kanë bërë thirrje qeverisë së Kosovës dhe asaj të Serbisë që të vazhdojnë të punojnë urgjentisht drejt qetësimit të situatës aktuale.

Gjithashtu SHBA u kanë bërë thirje të gjitha palëve që të përmbahen nga përdorimi i dhunës.

Lëvizja e lirë e produkteve midis Serbisë dhe Kosovës duhet të adresohet në kuadër të dialogut të ndërmjetësuar nga bashkimi Evropian. Hapat e njëanshëm nga të dyja palët – imponimi i Serbisë për embargo të njëanshme të prodhimeve të Kosovës nga viti 2008 dhe vendimi i fundit i Kosovës për të vendosur reciprocitet pas dështimit të të dyja palëve të arrijnë marrëveshje për normalizimin e doganave – kanë rezultuar me këtë rrugë qorre”, thuhet në deklaratën e Departamentit Amerikan të Shtetit. (a.v.)


BE: “Duhet të kthehemi aty ku ishim..."

Albana Isufi

Përfaqësues të Bashkimit Evropian kanë thënë se aksioni i autoriteteve kosovare për të vënë nën kontroll pikat kufitare 1 dhe 31 në veri të vendit, nuk ishte i dobishëm.

Aksioni nuk është bërë në konsultim me bashkësinë ndërkombëtare dhe BE-ja nuk e ka miratuar atë", ka thënë përfaqësuesi i BE-së për Kosovën, Fernando Gentilini.

Ndërkaq, Maja Kocijançiq, zëdhënëse e kabinetit të kryediplomates evropiane Ketrin Eshton, tha për Radio Evropa e Lirë, se BE kërkon që situata të qetësohet dhe të kthehet në gjendjen e mëparshme.

Është thelbësore që situata të qetësohet tani dhe të kthehemi ku kemi qenë. Misioni ynë për sundimin e ligjit, EULEX, është i gatshëm që t’i ndihmojë autoritetet e Kosovës në këtë drejtim", ka thënë Kocijançiq, për të shtuar se "dialogu është mënyra e vetme që të zgjidhet çështja e vulave të doganave dhe të rivendoset tregtia e lirë në të dy drejtimet".

E pyetur nëse kthimi në situatën e mëhershme nënkupton tërheqjen e njësive të policisë nga pikat kufitare 1 dhe 31, Kocijançiq, është përgjigjur:

Duhet të kthehemi në situatën që kemi qenë, në mënyrë që situata të qetësohet dhe që të rifillojmë punën tonë në kuadër të dialogut”.

Ajo gjithashtu ka thënë se Bashkimi Evropian ka potencuar se as vendimi për embargon nuk ka qenë i dobishëm dhe se duhet dhënë mundësi dialogut.

Veprimet e autoriteteve kosovare kanë ardhur pas vendimit për vendosjen e masës së reciprocitetit ndaj mallrave serbe.

Pikat kufitare në veri janë parë si pengesa kryesore në zbatimin e këtij vendimi, për shkak të mos-kontrollimit të mallrave që kalojnë nga Serbia në Kosovë.

Ndërkohë, EULEX-i, ka konfirmuar përmes një komunikate për media, se nuk ka qenë i përfshirë në aksionin e ndërmarrë nga njësitë speciale të policisë së Kosovës.

"Veprimet e njëanshme nga cilado palë nuk ndihmojnë aspak. Problemet duhet të zgjidhen në mënyrë paqësore”, ka thënë EULEX-i.

Në anën tjetër, komandanti i KFOR-it gjenerali Erhard Byhler, i ka bërë apel të gjithë qytetarëve të Kosovës që të mos reagojnë me dhunë kundër situatës së tashme në veri.

Agjenci të ndryshme të lajmeve, kanë raportuar gjatë ditës, se KFOR-i po negocion me Qeverinë e Kosovës një marrëveshje për të tërhequr njësitë speciale nga pikat kufitare.

Por, nga zyra e kryeministrit, Bekim Çollaku, këshilltari i lartë politik i kryeministrit të Kosovës, tha për Radio Evropa e Lirë se nuk ka ndonjë marrëveshje lidhur me çështjen e pikave kufitare në veri të vendit ndërmjet Kosovës dhe Serbisë.

Asnjë lloj marrëveshje nuk ka deri më tani. Është çështje sundimit të rendit dhe ligjit, asgjë më shumë e as më pak”, ka thënë Çollaku.

KFOR përmes njoftimit për media bën të ditur se pasi që është informuar mbi situatën, i ka alarmuar një numër të konsiderueshëm njësish që të ndërhyjnë nëse është nevoja.

Qeveria e Kosovës ka thënë se me aksionin e ndërmarrë dje, synon të shtrijë sundimin e ligjit edhe në pjesën veriore, që deri tash është kontrolluar nga strukturat paralele serbe të financuara nga Beogradi zyrtar.

Qeveria, me gjithë se nuk është konsultuar me EULEX-in, në lidhje me aksionin, thotë se qëllimi është i njëjtë me mandatin që ka ky mision ën Kosovë- vendosjen e sundimit të ligjit.

E pyetur, se përse nuk u mbështetën autoritetet kosovare, duke pasur parasysh qëllimet e përbashkëta, Maja Kocijanciq nga Bashkimi Evropian, u shpreh:

"E shpjegova se ky (aksion) nuk është ndërmarrë në konsultime me ne. EULEX-i, nuk ka marrë pjesë në të. Ne edhe për vendimin për embargon, kemi thënë se ai nuk ishte i dobishëm dhe se duhej dhënë shansi dialogut, aq më tepër se ishim afër një marrëveshjeje për vulat doganore”, ka thënë Kocijanciq.

Ajo ka thënë se nuk di se si do të zhvillohen gjërat, dhe nëse veprimi i autoriteteve të Kosovës do të pasohet me konsekuenca.

Trego komentet

XS
SM
MD
LG