Ndërlidhjet

Thaçi: EULEX-i nuk deshi të na ndihmojë


Fotografi ilustruese

Fotografi ilustruese

Nuk do të ketë kthim në gjendjen e mëparshme në pikat kufitare në veri, ka thënë kryeministri Hashim Thaçi.

Ai ka kritikuar ashpër misionin e EULEX-it, duke thënë se ky mision ka qenë i informuar por nuk ka dashur ta ndihmojë qeverinë në vendosjen e rendit në veri.

Gjatë mbledhjes së qeverisë, Thaçi ka thënë se Kosova ka luajtur një rol shumë konstruktiv në raport me Bashkimin Evropian dhe EULEX-in, por kjo nuk i është kundërshpërblyer me bashkëpunim në veri.

Nëse misioni i EULEX-it mendon se lejimi i kontrabandës, krimit të organizuar dhe cenimit të sovranitetit të shtetit të pavarur e sovran të Kosovës është diçka normale që duhet lejuar, atëherë le të na e japin vetëm një shembull konkret se në cilin shtet të Bashkimit Evropian tolerohet krimi, korrupsioni, kontrabanda dhe strukturat e armatosura, strukturat paralele”, ka deklaruar Thaçi.

Ndërsa ka kritikuar EULEX-in, kryeministri i Kosovës ka falënderuar KFOR-in për bashkëpunim.

Thaçi ka thënë po ashtu se në veri të Kosovës si vendorët ashtu edhe ndërkombëtarët kanë dështuar për 12 vjet.

Funksionimi i strukturave ilegale dhe kontrabanda e bëjnë këtë pjesë vrimë të zezë si për Kosovën e rajonin ashtu edhe për gjithë Evropën e cila ishte pajtuar me një gjendje të tillë, ka vlerësuar kryeministri i Kosovës.

Vendimi i qeverisë së Kosovës për të vendosur nën kontroll vendkalimet kufitare 1 dhe 31 në veri, nga analistët shihet si i domosdoshëm pas refuzimit të EULEX-it që t’i zbatojë masat e reciprocitetet që qeveria vendore kishte vendosur në raport me Serbinë.

Ky veprim i qeverisë, sipas analistit Shkëlzen Maliqi në fazën e parë ishte i suksesshëm, por për fazat e mëtutjeshme ai parasheh si të nevojshme të ketë një marrëveshje, pasi që atje dogana e Kosovës nuk mund të funksionojë në këtë terren në vazhdimësi, nën masat e shtuara të sigurisë.

Besoj se policia e Kosovës sado që i ka këto forcat speciale të afta e të ushtruara për kryerjen e detyrës, ato nuk do të mund të qëndrojnë tërë kohën për ta mbrojtur doganën e Kosovës në një ambient të tillë, rrethim të tillë çfarë është Leposaviqi dhe veriu i Kosovës".

"Ato janë pika të izoluara ku Leposaviqi i ka 60 kilometra, ku gjithnjë mund të ndodhin këso bllokada të qytetarëve. Domethënë duhet të arrihet një marrëveshje për formën se si do të qëndroj atje dhe të veproj, jetë efikase dogana e Kosovës”, vlerëson Maliqi.

Ndërkohë, analisti Krenar Gashi, drejtor i Instituti KIPRED, thotë se aksioni i qeverisë ishte i drejtë dhe plotësisht legjitim.

Ai beson se gjendja e re e krijuar në pikat doganore me Serbinë, tani e barazon pozicionin e Kosovës në bisedime.

Veriu i Kosovës, vijon ai, është shfrytëzuar në vazhdimësi nga Beogradi për të sfiduar bisedimet dhe kërcënuar me hapjen e temës së veçantë për këtë pjesë të Kosovës në tavolinën e bisedimeve.

Ky veprim i qeverisë dhe policisë së Kosovës e barazon rolin e Kosovës karshi Serbisë në këtë tavolinë bisedimesh, për arsyen më të thjeshtë sepse duke mos i pasur në kontroll dy pikat kyçe doganore me Serbinë, Kosova ka qenë në një pozicion shumë të pafavorshëm karshi Serbisë në këto bisedime”, thotë Gashi.

Vendosja e pikave doganore, pa vendosjen e një rendi ligjor në veri, nuk shihet si zgjidhje e qëndrueshme në një afat më të gjatë nga analisti Shkëlzen Maliqi.

Ai parasheh se do të ketë nevojë për një zgjidhje dhe dialog në mënyrë që edhe strukturat e tashme paralele serbe atje, të integrohen gradualisht në kuadër të planit të Ahtisarit dhe të përfshihet në kuadër të dialogut Kosovë - Serbi.

Kjo në të vërtetë kërkon një zgjidhje në kuadër të Pakos së Ahtisarit. Serbia ka bërë disa lëshime fillestare, por duhet të jetë e vëmendshme që edhe për interesat e saj afatgjate, thjeshtë të ndikojë në popullatën serbe në veri që gradualisht të integrohet në Kosovë. A duhet të paguajë edhe Kosova ndonjë çmim për këtë apo të bëjë ndonjë lëshim, ndonjë plan ose ndonjë projekt Ahtisari plus, ato do t’i shohim, nuk mund t’i vlerësojmë në këtë moment”, thotë Maliqi.

Një çështje tjetër që tani duhet sqaruar në veri ka të bëjë me praninë ndërkombëtare, thotë analisti Krenar Gashi.

Sipas tij, qeveria e Kosovës duhet ta qartësojë me Brukselin se vendosja e ligjshmërisë në veri dhe pikat doganore atje, ishte një hap i ligjshëm, i drejtë dhe i domosdoshëm.

Kujtoj që tani në rrafshin politik është koha e fundit që Qeveria e Kosovës t’i sqarojë punët me Bashkimin Evropian, duke pasur parasysh këtu edhe rolin e misionit të EULEX-it në Kosovë. Është e papranueshme për popullatën e Kosovës fakti që misioni i EULEX-it refuzon të zbatojë një vendim legjitim të Qeverisë së Kosovës për masat e reciprocitetit karshi Serbisë”,vlerëson Gashi.

Aksioni në veri, ishte një mesazh i shtetësisë së Kosovës, thonë analistët të cilët presin që qeveria të mbetet e vendosur dhe të mos lejojë më kthimin e gjendjes së mëparshme.
  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

Trego komentet

XS
SM
MD
LG