Komandanti i KFOR-it, Gjenerali Erhard Byler, në orët e mbrëmjes ka zhvilluar një takim të shkurtër me shefin e delegacionit serb në bisedimet me Kosovën, Borislav Stefanoviq dhe ministrin serb për Kosovën, Gordan Bogdanoviq.
Lajmi konfirmohet nga forcat paqerujatëse, të cilat në një komunikatë takimin e kanë cilësuar si “shkëmbim të shkurtër dhe joformal të pikëpamjeve”.
Takimi është mbajtur në afërsi të kampit të KFOR-it, Noting Hill, ndërmjet fshatit Sllatinë dhe Leposaviqit.
“Para bisedave joformale, komandanti i KFOR-it është ndaluar në bllokadën rrugore në Sllatinë”, thuhet në komunikatë, ku bëhet e ditur se vetëm pasi protestuesit kishin liruar rrugën, gjenerali Byler kishte zhvilluar takimin.
Hollësi të tjera mbi këtë takim nuk janë dhënë, ndonëse është paralajmëruar mundësia e një takimi tjetër gjatë ditës së nesërme.