Ndërlidhjet

Beogradi të heqë dorë nga veriu!


Angela Merkel
Angela Merkel
Kancelarja gjermane, Angela Merkel, do të vizitojë Serbinë. Pritjet janë që edhe Merkel - ashtu siç bëri kryediplomati i Qeverisë së saj në Prishtinë – të përsërisë qëndrimin se integriteti territorial i Kosovës mbetet çështje e padiskutueshme për Gjermaninë. Diploamtët perëndimorë dhe analistët në Beograd shprehin bindjen se kancelarja gjermane do t’iu kërkojë autoriteteve serbe të heqin dorë nga veriu i Kosovës.


Dhjetë ditë para vizitës së kancelares gjermane, Angela Merkel, në Beograd, ministri i Jashtëm i Qeverisë së saj, Guido Vestervelle, u ka bërë thirrje pesë vendeve të Bashkimit Evropian që nuk e kanë njohur Kosovën, ta bëjnë një gjë të tillë. Gjatë qëndrimit në Prishtinë, ai ka theksuar se integriteti territorial i Kosovës mbetet çështje e padiskutueshme për Gjermaninë.

Diplomatët perëndimorë nuk kanë dyshim se edhe kancelarja gjermane do t’ia përsërisë të njëjtin qëndrim presidentit serb, Boris Tadiq, dhe bashkëbiseduesve të tjerë në Beograd.

Një gjë të tillë e konfirmon edhe deputetja e Parlamentit Evropian, Doris Pak.

Sipas saj, Merkel do t’iu theksojë nikoqirëve se “është në interesin e Serbisë të vendosë marrëdhënie të mira me Kosovën” dhe se “tensionet nuk bën të përsëriten kurrë”.

E pyetur nëse kancelarja gjermane në Beograd do të deklarohet në mënyrë specifike për kufijtë dhe veriun e Kosovës, Doris Pak, pa dilemma, shprehet:

“Pres që ajo të theksojë se Kosova duhet të mbetet brenda kufijve të njohur nga ana e Gjermanisë dhe se Serbia, në një mënyrë ose tjetër, duhet të pajtohet me një gjë të tillë".

"Merkel me siguri nuk do të thotë se Serbia duhet që nesër ta njohë pavarësinë e Kosovës, por me siguri do t’i rekomandojë Tadiqit që të krijojë marrëdhënie më korrekte dhe miqësore me Kosovën”,
thotë Pak për Radion Evropa e Lirë.

Shumë analistë në Beograd presin që kancelarja gjermane të bëjë presion të fortë ndaj Serbisë, që ta lërë veriun e Kosovës në duart e autoriteteve kosovare, përkatësisht të tërhiqet plotësisht nga Kosova.

Përderisa nuk vepron ashtu, analisti Millan Nikolliq thotë se Serbia do ta fitojë kandidaturën për BE, por jo edhe negociatat.

“Kandidatura pa datë të fillimit të negociatave për anëtarësim, nuk do të thotë asgjë, çfarë e dëshmon edhe rasti i Maqedonisë, e cila që gjashtë vjet vendnumëron me statusin e kandidatit, por pa datë të caktuar për fillimin e negociatave”, thotë Nikolliq.

Bindje të ngjashme ka edhe Ognjen Pribiqeviq, ish-ambasador i Serbisë në Berlin.

“Pres që ajo (Merkel) ta mbështesë kandidaturën tonë deri në fund të vitit, por është pikëpyetje e madhe nëse do të kemi datë për fillimin e negociatave”, thotë Pribiqeviq.

Se Serbisë do t’i kërkohët që t’ia lërë veriun e Kosovës Prishtinës, tërthorazi sugjeron edhe raportuesi për Serbinë në Parlamentin Evropian, Jelko Kacin. Si raportues për Serbinë, nuk jam kompetent të flas për Kosovën e as në emër të kancelares gjermane, Angela Merkel, thotë Kacin për Radion Evropa e Lirë.

Jelko Kacin
“Por, është e vërtetë që Gjermania e ka njohur Kosovën bashkë me veriun e saj”, thotë Kacin.

Në pyetjen nëse shkrimi i botuar së fundmi në Frakfurter Allgemenine Zeitung nga kryediplomati gjerman, Guido Vestervelle, dhe homologu i tij britanik, Uilliam Hejg – i cili kërkon nga Prishtina dhe Beogradi të zgjidhin mosmarrëveshjet reciproke duke respektuar kufijtë e Kosovës – shpreh qëndrimin mbizotërues të Brukselit, Kacin thotë:

“Të gjitha luftërat ballkanike nga vitet ’90 e deri më sot nuk kanë sjellë ndonjë ndryshim të kufijve. Të gjithë kufijtë e brendshëm të ish-Jugosllavisë deri më tash janë respektuar dhe ashtu pritet edhe në rastin e Kosovës, sepse nëse flasim për ndarjen e Kosovës, atëherë mund të flasim edhe për ndarjen e Bosnjë e Hercegovinës dhe, në fund të fundit, edhe për ndarjen e Serbisë".

"Mendoj se askush nuk është i interesuar që të vijë deri te një domino-efekt i tillë, i cili do të destabilizonte sërish Ballkanin Perëndimor. Ajo çfarë kërkojmë janë lajmet pozitive nga Ballkani Perëndimor”,
thotë Kacin. (v.t.)
XS
SM
MD
LG