Ndërlidhjet

Dialogu dhe sovraniteti


Fotografi ilustruese
Fotografi ilustruese
Kosova do të vazhdojë dialogun me Serbinë mbi parimet e barabarta si shtet dhe mbi bazat e Kushtetutës dhe Pakos së Ahtisarit, ka deklaruar kryeministri Hashim Thaçi.

Në anën tjetër, opozita e cilëson shumë të ngutshëm vendimin e qeverisë që të vazhdojë bisedimet me Serbinë pa kushte, pas zhvillimeve të fundit në veri dhe implikimeve të qeverisë serbe atje.

Sidoqoftë, kryeministri Thaçi përsëriti sot se Prishtina po shkon në bisedime si palë e barabartë që pozicionin e vet e ka ndërtuar mbi bazat e kushtetutës dhe dokumentit gjithëpërfshirës për statusin.

Ne jemi në përfundim të procesit të pavarësisë së mbikëqyrur dhe në kuadër të kësaj të konsolidimit të shtetit tonë dhe natyrisht të respektimit të plotë të Kushtetutës dhe ligjeve të Kosovës, dokumentit të presidentit Ahtisari, pra konsolidimit, forcimit dhe avancimit të shtetësisë së Kosovës”, ka deklaruar Thaçi.

Ndërkohë, Lidhja Demokratike e Kosovës, si subjekti më i madh opozitar, i sugjeron qeverisë që të mos i vazhdojë bisedimet pa ridefinimin e tyre.

Deputeti i kësaj partie, Skender Hyseni, thotë se dialogu nuk do të duhej të vazhdonte pa përcaktimin e kornizës së re të këtyre bisedimeve, në formën e vijave të kuqe.

Pranimi i dy llojeve të auto-targave apo edhe i dy llojeve të vulave, nëse kjo do të ndodhë më 2 shtator, sipas Hysenit do të nënkuptonte një sovranitet të ndarë që do të ishte kundër parimeve kushtetuese.

Dialogu nuk do të duhej të vazhdonte pa përcaktimin e qartë të disa parimeve prijëse të cilat do të siguronin që Kosova nuk do të prekte në karakterin unitar, do ët siguronin që Kosova nuk do të instalonte sovranitet të ndarë. Por meqenëse qeveria ka vendosur dhe ka marrë vendim që të vazhdoj dialogu atëherë do të duhej që Republika e Kosovës në këtë dialog të mos pranonte as një zgjidhje që do të linte përshtypjen e instalimit të këtij sovraniteti të ndarë”, është shprehur Hyseni.

Kundër vazhdimit të bisedimeve shprehet edhe Aleanca për Ardhmërinë e Kosovës.

Shefi i Grupit Parlamentar të AAK-së, Ardian Gjini thotë se ky dialog po i shërben vetëm Serbisë për interesat e saj në proceset integruese evropiane dhe po e dëmton shtetësinë e Kosovës, andaj edhe kuron që bisedimet të ndërpriten.

Ne mendojmë se Serbia e ka të qartë synimin, kurse Kosova jo. Kemi kërkuar eksplicit që Qeveria e Kosovës ta përgatis një platformë dhe që ajo të jetë nacionale dhe përmes saj të bisedohet me Serbinë.
Qëndrimi i Aleancës edhe më herët ka qenë që ky dialog nuk po shkon në interesin e Kosovës dhe do të duhej të ndërpritet ose të paktën Kosova duhet ta ketë një platformë të veten të qartë se çka kërkon të arrijë me këtë dialog. Ne mendojmë se Serbia e ka të qartë synimin, kurse Kosova jo. Kemi kërkuar eksplicit që Qeveria e Kosovës ta përgatis një platformë dhe që ajo të jetë nacionale dhe përmes saj të bisedohet me Serbinë”, ka thënë Gjini.

Sidoqoftë, i dërguari i Bashkimit Evropian për ndërmjetësimin në dialogun midis Kosovës dhe Serbisë, Robert Kuper, ka marrë pëlqimin e të dyja qeverive që bisedimet të vazhdojnë me 2 shtator në Bruksel.

Tregtia e lirë, vulat e doganave, bashkëpunimi rajonal dhe disa tema tjera që tashmë janë diskutuar, do të jenë sërish në tavolinën e bisedimeve ndërmjet të dyja palëve.
XS
SM
MD
LG