Ndërlidhjet

logo-print

Caktohen datat e zbatimit

  • RFE /RL

Njëri nga raundet e bisedimeve Kosovë-Serbi...

Njëri nga raundet e bisedimeve Kosovë-Serbi...

Grupet e ekspertëve nga Kosova dhe Serbia, në takimin e ndërmjetësuar nga Bashkimi Evropian, kanë rënë dakord në Bruskel për datat e zbatimit të marrëveshjeve për lëvizjen e lirë dhe dokumentet kadastrale.

Sipas një komunikate për media të Qeverisë së Kosovës “lidhur me marrëveshjen për kthimin e dokumentacionit kadastral, ekspertët e të dyja vendeve kanë rënë dakord që më 20 nëntor, 2011, ta aprovojnë planin për implementim dhe po ashtu të fillojnë me zbatimin e plotë të kësaj marrëveshjeje”.

Me këtë marrëveshje, sqarohet në komunikatë, Serbia obligohet t’i kthejë dokumentet kadastrale të marra nga Kosova gjatë luftës. Ndërsa, Kosova thuhet se merr obligime të kompletojë sistemin e vet kadastral, si dhe në mënyrë të veçantë t’i zgjidhë çështjet kontestuese kadastrale konform Kushtetutës së Republikës së Kosovës dhe standardeve evropiane.

Sipas njoftimit të qeverisë, në takimin për zbatimin e marrëveshjes për lirinë e lëvizjes në mes të Republikës së Kosovës dhe Serbisë janë përafruar qëndrimet mes palëve rreth planit të zbatimit.

“Qeveria e Kosovës në këtë takim konfirmoi se i ka përmbyllur të gjitha përgatitjet e nevojshme për zbatimin e kësaj marrëveshjeje. Po ashtu u konfirmuan përgatitjet që me 1 nëntor në Kosovë të fillojë zbatimi i asaj pjese të marrëveshjes për heqjen nga përdorimi të tabelave ilegale të automjeteve dhe zëvendësimi me ato legale”, thuhet në komunikatë.

Gjatë këtij takimi thuhet se u diskutuan edhe modalitetet e zbatimit në praktikë, duke sqaruar se ditët në vijim paraqesin kohën e fillimit të zbatimit.

Kosova ka nisur dialogun për çështje teknike me Serbinë në muajin mars të këtij viti. Që nga ajo kohë, nën ndërmjetësimin e BE-së, janë arritur pesë marrëveshje, por zbatimi i tyre ka shënuar ngecje. (a.i.)

Trego komentet

XS
SM
MD
LG