Ndërlidhjet

Pak barna për të diagnostikuarit me kancer


Qendra Klinike Universitare e Kosovës

Qendra Klinike Universitare e Kosovës

Kosova nuk ka kancer-regjistër, nga i cili do të dihej saktë se sa është numri i personave të prekur me këtë sëmundje. Si pasojë e kësaj, pacientët kanë ankesa të kohëpaskohshme për mungesë të terapisë.

Tjetër qëndrim kanë zyrtarët shëndetësorë, të cilët thonë se mungesa e barnave ndodh për shkak të rritjes së numrit të personave që preken me këtë sëmundje – gjë kjo që shkakton edhe vonesa në planifikim.

Ndryshe, një e katërta e buxhetit të Ministrisë së Shëndetësisë ndahet për pacientët e prekur me kancer. Sipas zyrtarëve shëndetësorë, 4 milionë euro u dedikohen citostatikëve - terapi kjo me të cilën trajtohen personat e diagnostikuar me kancer.

Por, përkundër një fakti të tillë, pacientja Hilmije Bajrami ankohet për mungesë të terapisë.

“Ministria thotë se e ka marrë përgjegjësinë për ta siguruar këtë terapi, që është esenciale, por kur unë shkoj në Institutin Onkologjik, ajo mungon”, thotë Bajrami.

Onkologia Mejreme Krasniqi Maloku pranon se, muajin e fundit, ka pasur një “mungesë të lehtë të herceptinës”, por, sipas saj, nuk bëhet fjalë për zvogëlim të furnizimit. Ajo flet për detaje të tjera:

“Muajin e fundit shihet një mungesë e herceptinës dhe pacientët shprehin pakënaqësitë e veta. Por, nuk është fjala për mosplanifikim të mirë; është në pyetje rritja e numrit të pacientëve të diagnostikuar”.

“Edhe po të bëjmë një planifikim më të mirë, kemi probleme buxhetore, sepse Ministria e Shëndetësisë i ka vetëm 4 milionë euro për citostatikë, ndërsa 2 milionë shkojnë për herceptinë”, thotë Krasniqi Maloku.

Zyrtarë të Ministrisë së Shëndetësisë sqarojnë se vetëm një ampulë e herceptinës kushton 1,500 euro. Sipas burimeve të njëjta, një pacient që duhet t’i përfundojë ciklet e kësaj terapie, i kushton Ministrisë 25 mijë euro.

Faik Hoti, drejtor i departamentit të informimit në këtë ministri, shpjegon:

“Mund të them se këtë vit, furnizimi me herceptinë ka qenë më i miri prejse aplikohet kimioterapia në Kosovë. Herceptina është një citostatik shumë i shtrenjtë. Ministria e Shëndetësisë e ka furnizuar Institutin e Onkologjisë me këtë ilaç sipas planifikimeve të fillimvitit, që janë bërë nga instituti”.

“Normalisht, asnjë vonesë nuk është e favorshme për shëndetin e pacientëve, por edhe pacientët, edhe familjarët e tyre duhet ta kenë parasysh situatën në të cilën gjendet shëndetësia kosovare - me një buxhet shumë të kufizuar”,
thotë Hoti.

Onkologia Krasniqi Maloku kritikon qytetarët, ndërsa shpreh besimin se pa rritje të buxhetit për barna, është e pamundur të mbulohen të gjitha nevojat e pacientëve, marrë parasysh, sipas saj, koston e sëmundjes së kancerit dhe rritjen e të prekurve me të çdo ditë e më shumë.

“Qytetarët mendojnë se ky shtet i varfër, pa sigurime shëndetësore, duhet t’ua sigurojë 100 për qind terapinë. Kjo është një logjikë e gabuar e qytetarëve. Ka edhe sëmundje të tjera joonkologjike, për të cilat duhet të furnizohen pacientët, edhe pse ato janë shumë më pak të mbuluara me barna nga lista esenciale”, thotë Krasniqi Maloku.
  • 16x9 Image

    Ariana Kasapolli - Selani

    Ariana Kasapolli - Selani ka lindur më 15.04.1980 në Prishtinë. Shkollimin fillor, të mesëm dhe universitar e ka ndjekur në Prishtinë, ku edhe ka diplomuar në Fakultetin e Gazetarisë. Si korrespondente e Radios Evropa e Lirë punon që nga viti 2009. Është e martuar dhe ka tre fëmijë.

Trego komentet

XS
SM
MD
LG