Ndërlidhjet

S'ka informacione për hetime


Nga përleshjet e 28 nëntorit në Jagnjenicë...
Nga përleshjet e 28 nëntorit në Jagnjenicë...
Më shumë se dy javë pas incidenteve në Jarinë dhe Jagnjenicë, ku pas disa përleshjeve mes banorëve lokalë serbë dhe forcave të KFOR-it - që bënin përpjekje për largimin e barrikadave - u plagosën me armë zjarri dy dhe u lënduan dhjetëra ushtarë të misionit paqeruajtës, EULEX-i nuk jep informacione lidhur me hetimet.

Komandanti i KFOR-it, Erhard Drevs, ka bërë të ditur se dy serbë, Zvonko Veselinoviq dhe vëllai i tij, janë identifikuar si organizatorë dhe liderë të akteve të fundit të dhunës, që janë kryer kundër ushtarëve ndërkombëtarë të KFOR-it te barrikadat në Jarinë dhe Jagnjenicë.

Erhard Drevs
Erhard Drevs
“Sulmet e dhunshme në Jarinë janë organizuar dhe udhëhequr nga Zvonko Veselinoviq, përderisa konflikti në Jagnjenicë është udhëhequr nga vëllai i tij”, ka deklaruar komandanti i KFOR-it, duke shtuar se “ekzistojnë video-incizime që i mbështesin këto pohime, të cilat i janë dërguar edhe EULEX-it”.

Por, zyrtarët e këtij të fundit nuk kanë dashur të komentojnë asgjë lidhur me hetimet sa i përket plagosjes së ushtarëve të KFOR-it në veri.

Zëdhënësi i misionit evropian, Blerim Krasniqi, ka thënë se vazhdon mbledhja e provave.

“Ajo që mund të them është se misioni, në përgjithësi, nuk komenton për hetimet, veçanërisht kur kemi të bëjmë me mbledhjen e dëshmive. Arsyeja përse nuk i bëjmë këto komente, është për t’i mbrojtur vetë hetimet. Megjithatë, duhet të thuhet se KFOR-i dhe EULEX-i vazhdojnë të bashkëpunojnë ngushtë”, ka thënë Krasniqi.


​Deklaratave të komandantit Drevs, përfaqësuesit e KFOR-it kanë thënë se nuk kanë çfarë t’iu shtojnë.

I pyetur nga Radio Evropa e Lirë se a posedon misioni informacione shtesë për incidentin në fjalë, njëri nga zëdhënësit e KFOR-it, Frank Martin, është shprehur:

“Jo, nuk duam të komentojmë. Për informacione të tjera duhet të kontaktoni EULEX-in, sepse EULEX-i përfundimisht merret me këto gjëra”.

Për mbledhjen e provave nga terreni, lidhur me incidentet në veri, Policia e Kosovës është duke e ndihmuar EULEX-in.

Besim Hoti, zëdhënës i policisë për rajonin e Mitrovicës, ka konfirmuar se autoritetet policore janë në bashkëpunim të ngushtë me komponentët policorë dhe hetuesit e EULEX-it.

“Policia e Kosovës është gjithsesi pjesë e mbledhjes së të gjitha provave materiale ose çfarëdolloj informacioni që do të shërbente për ndjekjen penale të personave të dyshuar. Policia e Kosovës, në kuadër të veprimeve të veta të hulumtimit, sigurisht që ka mbledhur prova të mjaftueshme", ka thënë Hoti.

Ndaj deklaratave të komandantit të KFOR-it, Erhard Drevs, që akuzojnë Veselinoviqin për orkestrim të dhunës në veri, ka reaguar sot edhe ministri i Brendshëm i Serbisë, Ivica Daçiq.

Ai ka thënë se as Zyra e Prokurorit e as EULEX-i nuk i kanë dhënë Policisë së Serbisë asnjë informacion në lidhje me pjesëmarrjen e dyshuar të tij në dhunën që është zhvilluar në Jarinë dhe Jagnjenicë.

Sipas tij, serbët kanë të drejtë të shprehin kërkesat e tyre politike, “ashtu siç kanë pasur të drejtë edhe shqiptarët", ndërsa deklaratat e komunitetit ndërkombëtar se qendra e krimit është në veri të Kosovës, “nuk janë të vërteta”.
Qendra e krimit është në Prishtinë dhe Shqipëri. Mafia shqiptare është më e forta në botë.

“Kjo është gënjeshtër. Qendra e krimit është në Prishtinë dhe Shqipëri. Mafia shqiptare është më e forta në botë. Këto nuk janë fjalët e mia, por fjalë të shërbimeve ruse, gjermane dhe amerikane. Ndërsa, ne flasim për Zvonko Veselinoviqin... Nuk mund të besoj se në çfarë niveli kemi ardhur”, ka thënë Daçiq.

Të hënën, komandanti i forcave paqeruajtëse ka deklaruar se dy granata janë hedhur në drejtim të ushtarëve të KFOR-it. Dy prej tyre, përfshirë edhe komandantin e njësisë, janë ende në spital.

Që nga vera e sivjetme, serbët kanë ngritur barrikadat nëpër rrugët në veri, në shenjë kundërshtimi ndaj vendosjes së policëve dhe doganierëve kosovarë në pikat kufitare në Bërnjak dhe Jarinë.
XS
SM
MD
LG