Vëzhguesit ndërkombëtarë thonë se zgjedhjet parlamentare në Kazakistan kanë dështuar t’i arrijnë parimet themelore demokratike.
Organizata për Siguri dhe Bashkëpunim në Evropë (OSBE) tha se me gjithë ambiciet e deklaruara për forcimin e proceseve demokratike, zgjedhjet e 15 janarit, “nuk i plotësuan parimet fundamentale të zgjedhjeve demokratike”.
Në komentet e tij në konferencën për shtyp në Astana, presidenti i Asamblesë Parlamentare të OSBE-së, Xhoao Soaresh, theksoi se pjesa më e madhe e partive opozitare ishin bllokuar nga pjesëmarrja në zgjedhje:
Ne shpresojmë se kjo do të ndryshojë në të ardhmen.
Sipas rezultateve preliminare, partisë në pushtet Nur Otan, do t’i bashkohen dy parti: Ak Zhol dhe Partia Komuniste Popullore, që njihen si grupe lojale ndaj presidentit, Nursultan Nazarbaev.
Zyrtarët e zgjedhjeve thanë se Nur Otan ka fituar më tepër se 80% të votave, ndërsa dy partitë e tjera kanë fituar diçka më tepër se nga 7 për qind.
Me këto zgjedhje përfundoi një sundim shumë i kritikuar njëpartiak në Kazakistan, megjithëqë asnjë parti e vërtetë opozitare nuk ia doli të fitoj vende në Parlamentin me 107 deputetë.
E vetmja parti e njohur si opozitë e vërtetë, Partia Gjithëkombëtare Socialdemokrate, që i ka kontestuar zgjedhjet, ka fituar vetëm 1.6% të votave.
Duke folur para gazetarëve në Astana, Miklosh Harashi, shefi i misionit vëzhgues zgjedhor afatgjatë, e ka kritikuar atë që ai e cilësoi si “ambient i fushatës së kontrolluar ashpër, në të cilën të drejtat zgjedhore të shtetasve ishin të kufizuara”.
Më tutje ai theksoi:
Rezultatet e zgjedhjeve, përfshirë edhe praninë e dy partive, ndaras nga partia shtetërore, mund të përshkruhen si zgjedhje të orkestruara.
Aktivistët opozitarë për nesër kanë paralajmëruar demonstratë në qendër të kryeqytetit Alma-Atë, për të protestuar kundër rezultateve të zgjedhjeve.
Më herët ata kanë thënë se zgjedhjet ishin përshkruar me shkelje të gjëra.
Nga ana tjetër, presidenti i Kazakistanit, Nursultan Nazarbajev, i ka lavdëruar zgjedhjet për “transparencën e paprecedentë” dhe për atë se ishin të “hapura”.
Katër përtej shtatë partive që morën pjesë në zgjedhje nuk e kaluar pragun 7% dhe nuk kanë fituar vende në parlament apo, siç thuhet në Kazakistan, Mexhilis.
Liderët opozitarë i kanë kritikuar autoritetet se kanë synuar që rivalët të mbesin jashtë parlamentit. (f. b.)